Հայաստանում այս պահին կա 282 հեմոֆիլիայով հիվանդ
13:34 17 ապրիլի, 2015Հայաստանի առողջապահության նախարարության պրոֆ. Ռ.Յոլյանի անվան արյունաբանական կենտրոնի ռեգիստրում հաշվառված է 282 հեմոֆիլիայով հիվանդ, որոնցից 82-ը` մինչեւ 18 տարեկան երեխաներն են: Այս մասին այսօր, Հեմոֆիլիայի միջազգային օրվա կապակցությամբ կազմակերպված ասուլիսի ժամանակ ասաց Կենտրոնի տնօրեն Սմբատ Դաղբաշյանը։
Ըստ նրա, տարեկան Հայաստանում գրանցվում է արյան մակարդելիության խանգարման 20 նոր դեպք, դրանցից 10–ի մոտ ախտորոշվում է հեմոֆիլիա։
Եթե 10 տարի առաջ Հայաստանում հեմոֆիլիայով հիվանդների կյանքի տեողության միջին տարիքը կազմում էր 28 տարեկան, ապա այսօր բուժման ժամանակակից եղանակների կիրառման շնորհիվ այն արդեն կազմում է 40-45 տարեկան։
Հեմոֆիլիայով տառապող հիվանդների թիվն աշխարհում կազմում է մոտ 400 հազար մարդ (10 000 տղամարդուց մեկը): Կանայք հեմոֆիլիայով սովորաբար չեն հիվանդանում, սակայն գենի կրող են հանդիսանում եւ կարող են հիվանդ որդիներ եւ հեմոֆիլիայի գեների կրող դուստրեր լույս աշխարհ բերել:
Հեմոֆիլիան արյան մակարդման համակարգի հիվանդություն է, որը պայմանավորված է մակարդման գործոնների պակասով եւ փոխանցվում է ժառանգաբար` կապված X քրոմոսոմի հետ:
Հիվանդությունը կլինիկորեն դրսեւորվում է տարաբնույթ արյունահոսություններով, արյունազեղումներով հոդերում, մկանային բունոցներում եւ օրգանիզմի այլ խոռոչներում: Կրկնվող ներհոդային արյունազեղումներն առաջացնում են հոդերի քրոնիկական բորբոքում, հետագայում հանգեցնում հաշմանդամության:
Ըստ էության, այս հիվանդության նույնիսկ ծանրագույն ձեւերը բուժման ենթակա են: Բուժման միակ միջոցը պակաս գործոնի ներարկումն է: Վաղ տարիքից պակաս գործոնի կանխարգելիչ ներարկումները թույլ են տալիս բացառել արյունահոսությունները, ներհոդային եւ մկանային արյունազեղումները եւ կանխել հաշմանդամությունը: