Նոյեմբերի 3-ին Երեւանում բարեգործական համերգ է լինելու շաքարախտով հիվանդ երեխաների համար
16:59 30 հոկտեմբերի, 2015Նոյեմբերի 14-ին նշվող շաքարախտի դեմ պայքարի միջազգային օրվա նախօրեին Երեւանում կկազմակերպվի Cartoon non stop խորագրով բարեգործական համերգ: Այդ մասին NEWS.am Medicine–ի թղթակցին հայտնել են Հայաստանի առողջապահության նախարարությունից:
Համերգը, որը կազմակերպվելու է Հայաստանի Առողջապահության նախարարության ու պետական երիտասարդական նվագախմբի նախաձեռնությամբ, կնշանավորի «Վերահսկիր շաքարախտը ու ապրիր լիարժեք կյանքով» ծրագրի մեկնարկը, որի նպատակն է աջակցել շաքարախտով հիվանդ երեխաներին ու երիտասարդներին:
Ակնկալվում է, որ համերգին կմասնակցեն շաքարախտով տառապող երեխաներն ու երիտասարդները, նրանց ծնողները, նաեւ բոլոր շահագրգիռ մարդիկ:
Համերգը կսկսվի նոյեմբերի 3-ին ժամը 19:00-ին՝ Ա. Սպենդիարյանի անվան օպերայի ու բալետի ազգային ակադեմիական թատրոնի շենքում: Համերգի գեղարվեստական ղեկավարն ու գլխավոր դիրիժորն է Սերգեյ Սմբատյանը:
Հիշեցնենք, որ հուլիսի 16-ին Հայաստանի կառավարության նիստում հաստատվել է «Վերահսկիր շաքարախտը ու ապրիր լիարժեք կյանքով» հնգամյա ծրագիրը, որը նախատեսված է առաջին տեսակի շաքարախտով հիվանդ մինչեւ 18 տարեկան երեխաների ու 18-23 տարեկան երիտասարդների համար:
Հիշեցնենք նաեւ, որ Հայաստանում այս պահին գրանցված են առաջին տեսակի շաքարախտով հիվանդ 450 երեխա ու 177 երիտասարդ (տարեկան մոտավորապես 50- 70 նոր դեպք է գրանցվում):