Հայկական դեղագործական PharmaTech ընկերությունը ՊԱԳ հավաստագիր է ստացել (ֆոտո)
16:45 25 դեկտեմբերի, 2015PharmaTech-ը Հայաստանի երրորդ դեղագործական ընկերությունն է, որը ՊԱԳ (Պատշաճ արտադրողական գործունեություն, GMP) հավաստագիր է ստացել: Ընկերության ղեկավար Վահան Առուշանյանին այսօր` դեկտեմբերի 25-ին հավաստագիրը հանձնել է Հայաստանի առողջապահության նախարար Արմեն Մուրադյանը:
«Սա երկրի համար նվաճում է, դա մեզ հնարավորություն է տալիս արտահանել մեր արտադրանքը, այն ներկայացնել միջազգային շուկայում», - ասել է Արմեն Մուրադյանը` հանձնելով հավաստագիրը:
Նա նշել է, որ ավանդույթի համաձայն, արարողությանը ներկա են ավելի վաղ GMP ստացած ընկերությունների ներկայացուցիչները եւ հույս հայտնեց, որ 2016-ին նրանց ցուցակը կավելանա։
Ինչպես NEWS.am Medicine-ին հայտնել է PharmaTech ընկերության տնօրեն Վահան Առուշանյանը, ընկերությունը հիմնադրվել է 1997-ին, սկսել է արտադրանք թողարկել 1998-ից եւ ի սկզբանե ստեղծվել է GMP նորմերին համապատասխան:
PharmaTech-ը ներերակային ինֆուզիոն հեղուկներ է արտադրում, Հայաստանի եւ Վրաստանի շուկաներում առաջատար ընկերություն է եւ հույս ունի, որ հավաստագիրն իրեն հնարավորություն կտա դուրս գալ այլ շուկաներ: Ընկերության մեկնարկային արտադրական հզորությունը տարեկան 1 մլն տոպրակ էր, այժմ արտադրության հզորությունն աճել է մինչեւ 6 մլն տոպրակ տարեկան:
Ընկերությունը նախատեսում է նաեւ մանրէազերծող միջոցների եւ դեղահաբերի արտադրամասեր բացել:
«GMP հավաստագրի ստացումը մեզ համար նոր նվաճումների եւ հայկական ապրանքանիշի առաջ մղման լրացուցիչ ազդակ է», - ասել է նա:
Հիշեցնենք, որ ավելի վաղ GMP հավաստագրեր էին ստացել «Լիկվորը» եւ «ԱրփիՄեդը»:
[gallery id=59]