Սթրեսը հաղթահարելու 6 միջոց
19:34 27 մարտի, 2016Սթրեսը բազմաթիվ հիվանդությունների եւ խնդիրների ուղղակի կամ անուղղակի պատճառն է հանդիսանում, այն նաեւ դեպրեսիա եւ տագնապալի իրավիճակ է առաջ բերում: Բրիտանացի փորձագետները հայտնել են, թե որոնք են սթրեսի դեմ պայքարի 6 ամենաանսովոր, բայց գործուն միջոցները:
Որքան քիչ, այնքան լավ
Արյան մեջ շաքարի հաշվեկշռի պահպանումը կարեւոր է սթրեսի մակարդակի նվազեցման համար: Սթրեսային հորմոնները գլյուկոզայի մեծ քանակություն են հետ նետում արյան շրջանառության մեջ: Հենց այդ պատճառով մարդը նյարդայնություն է զգում, երբ շաքարի մակարդակը բարձրանում է: Փորձագետները խորհուրդ են տալիս ամեն երկու-երեք ժամը մեկ սպիտակուցներով մի փոքրիկ ուտեստ ուտել. դա կօգնի վերահսկել սթրեսի մակարդակը:
Բարձր ծիծաղ
Որքան ավելի բարձր է ծիծաղում տղամարդը, այնքան նվազում է նրա սթրեսի մակարդակը: Բազմաթիվ հետազոտությունները ցույց են տալիս, որ ծիծաղը բարձրացնում է էներգիայի մակարդակը, նվազեցնում է սթրեսային հորմոնների ցուցանիշները, ամրապնդում է իմունիտետը եւ նույնիսկ ազատում է ցավից, որովհետեւ նպաստում է էնդորֆինների արտազատմանը:
Մարզումների ռեժիմը
Փորձագետները հետեւողականորեն խորհուրդ չեն տալիս երեկոյան քնից առաջ սպորտով զբաղվել, որովհետեւ դա մեծացնում է ադրենալինի մակարդակը, շնչառության եւ սրտխփոցի արագությունը, ինչը խանգարում է քնել: Իսկ որքան քիչ ենք քնում, այնքան բարձրանում է սթրեսի մակարդակը: Այդ պատճառով ֆիզիկական ինտենսիվ ծանրաբեռնվածությունն ավելի լավ է թողնել առավոտի համար, իսկ չափավորները` երեկոյի:
Ձու ուտել նախաճաշին
Մարդը պիտի հետեւի արյան մեջ սերոտոնինի «լավ հորմոնի» բավարար քանակությանը: Օրգանիզմը սերոտոնին է արտադրում տրիպտոֆանից, որը հանդիպում է սննդամթերքում, ներառյալ կաթնամթերքը, ձուկը, բանանը, չրերը, սոյան, նուշը եւ գետնանուշը:
Ընդմիջումներ
Եթե կարող եք աշխատանքային ընդմիջումներ անել` մի քանի րոպեով առանձնանալով որեւէ հանգիստ տեղում, որտեղ ձեզ ոչ ոք չի անհանգստացնի, դա իդեալական է: Հատկապես եթե տիրապետեք շնչառական մարմնամարզության արվեստին, որը հնարավորություն է տալիս հանգստի վիճակ տեղափոխել ամբողջ օրգանիզմը:
Կոֆեին
Կոֆեինը խթանիչ է, որն օրգանիզմին ստիպում է սթրեսի հորմոն արտադրել, բայց դրանից չի կարելի անսպասելիորեն հրաժարվել: Կրճատեք կոֆեինի օգտագործումը եւ անցեք դրա ավելի հաճելի տարատեսակների, ինչպիսին օրինակ մուգ, դառը շոկոլադն է: