Ամբողջ մարմնի համար կրիոթերապիայի օգտակարությունը մեծապես չափազանցված է, իրականում սառեցումը կարող է ավելի շատ վնաս տալ, քան օգուտ: Այդ մասին հայտնում է ամերիկյան Սննդամթերքի եւ դեղամիջոցների վերահսկողության վարչությունը (U.S. Food and Drug Administration, FDA):
Կրիոթերապիան ֆիզիոթերապիայի տեսակ է, որի դեպքում մարդու օրգանիզմը խստորեն սառում է: Կարծիք կա, թե ամբողջ մարմնի կրիոթերապիան օգնում է ամենատարբեր հիվանդությունների դեպքում` դեպրեսիայից եւ ճարպակալումից մինչեւ ասթմա եւ ցրված սկլերոզ: Պրոցեդուրայի ընթացքում հիվանդը մտնում է սենյակ կամ տեղավորվում խցիկում, որտեղ հետո գազ է լցվում, որի ջերմաստիճանը կարող է հասնել ըստ Ցելսիուսի 185 աստիճանի:
FDA-ի մասնագետները, ուսումնասիրելով բժշկական գրականությունը, եզրակացրել են, որ այդ պրոցեդուրայի օգուտը գուցե չափազանցված է, իսկ անվտանգությունն ապացուցված չէ:
Հետազոտողներից մեկը` Աննա Ղամբարյանը, մեկնաբանել է. «Մենք ուղղակի ոչինչ չգիտենք: Հանրայնորեն մատչելի տեղեկատվությունը բավարար չէ այդ հարցին պատասխանելու համար»:
FDA-ի տեսուչ Արոն Յուշտեյնը հավելում է. «Քանի որ սպառողները գնալով ավելի ու ավելի են հետաքրքրվում կրիոթերապիայով, FDA-ն ոչ պաշտոնապես ուսումնասիրել է այդ թեմայով առկա ամբողջ բժշկական գրականությունը: Մենք գրեթե ոչինչ չենք գտել, որը հաստատեր կրիոթերապիայի անվտանգությունը կամ էլ այն հիվանդությունների բուժման գործում արդյունավետությունը, որոնց կապակցությամբ այն գովազդվում է»:
Այսպիսով` FDA-ն խորհուրդ է տալիս զերծ մնալ ֆիզիոպրոցեդուրաների այդ տեսակի օգտագործումից: Մասնագետները հայտնում են, որ եթե մարդը սառեցված գազով լի սենյակում է գտնվում, նրա մոտ կարող է շնչահեղձություն սկսվել, թթվածնի պակասի հետեւանքով հիպօքսիա, նա կարող է կորցնել գիտակցությունը: Հնարավոր են նաեւ այրվածքներ եւ աչքերի վնասվածքներ:
FDA-ից նշել են, որ նրանց հանձնարարականները չեն նշանակում, թե պետք է ամբողջությամբ խուսափել կրիոթերապիայից, սակայն պրոցեդուրայից առաջ անհրաժեշտ է խորհրդակցել բժշկի հետ եւ չզարմանալ, եթե սպասված բարելավումը տեղի չունենա կամ էլ, ընդհակառակը, հակադիր արդյունքը ստացվի:
Հիշեցնենք, որ անցյալ տարի Նեւադայի նահանգում Չելսի Պատրիսիա Էյք-Սալվեյշն անունով աղջիկը մահացել էր կրիոթերապիայի պրոցեդուրայի ընթացքում: Նա սենյակ էր մտել սեփական նախաձեռնությամբ եւ առանց ուղեկցության եւ, ինչպես ցույց է տվել քննությունը, մահացել էր մի քանի րոպեում:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր