Մասաչուսեթսի տեխնոլոգիական ինստիտուտի ամերիկացի գիտնականները պատվաստանյութերով սպեղանի տպելու համար տպիչ են մշակել: Հետազոտությունը հրապարակվել է Nature Biotechnology ամսագրում:
Մասնագետների խոսքով՝ միշտ չէ, որ հեշտ է պատվաստանյութեր առաքել այն մարդկանց, ովքեր դրա կարիքն ունեն։ Շատ պատվաստանյութեր պահանջում են սառնարանում պահեստավորում, ինչը դժվարացնում է դրանց առաքումը հեռավոր տարածքներ, որտեղ անհրաժեշտ ենթակառուցվածք չկա: Գիտնականները առաջարկել են այս խնդրի հնարավոր լուծումը՝ շարժական պատվաստանյութերի տպիչ, որը կարող է տեղադրվել սեղանի վրա եւ օգտագործվել ամենուր, որտեղ պատվաստանյութեր են անհրաժեշտ:
Տպիչը տպում է պատվաստանյութով լցված միկրոասեղներով սպեղանիներ։ Սարքը կարելի է կիրառել կորոնավիրուսի եւ այլ հիվանդությունների դեմ պայքարում։
Մաշկի վրա կցվելուց հետո միկրոասեղները գրեթե անցավ բժշկական պատրաստուկ են հասցնում օրգանիզմ, ապա լուծվում: Տպելուց հետո պատվաստանյութի սպեղանին կարող է պահվել մի քանի ամիս սենյակային ջերմաստիճանում, մինչդեռ սովորական COVID-19 պատվաստանյութը պետք է օգտագործվի հալչելուց հետո մի քանի ժամվա ընթացքում:
Գիտնականները գյուտը փորձարկել են լաբորատոր առնետների վրա եւ համոզվել, որ COVID-19-ի դեմ սպեղանիի միջոցով առաքված դեղամիջոցը կենդանիների մոտ առաջացնում է նույն իմունային պատասխանը, ինչ ավանդական եղանակով ներարկված պատվաստանյութը: Գիտնականների խոսքով ՝ տպիչը կարող է օրական հարյուրավոր չափաբաժին պատվաստանյութ տպել։ Սարքն օգտակար կլինի այն վայրերում, որտեղ արձանագրվել է որեւէ հիվանդության բռնկում եւ անհրաժեշտ է բժիշկների արագ արձագանքը:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր