Ֆիզիկական ակտիվությունը բարձրացնում է դեմենցիայի դեմ պայքարող իրիսին հորմոնի մակարդակը. Neuron

Մասաչուսեթսի հիվանդանոցի ընդհանուր պրոֆիլի մասնագետները պարզել են, որ իրիսին հորմոնը, որն արտազատվում է ի պատասխան ֆիզիկական ակտիվության, կարող է նվազեցնել ուղեղում բշտերի քանակը Ալցհեյմերի հիվանդության ժամանակ, գրել է Neuron ամսագիրը։

Ալցհեյմերի հիվանդության հիմնական նշանը համարվում է բետա-ամիլոիդ սպիտակուցի կուտակումը։ Նախորդ հետազոտությունները ցույց են տվել, որ ֆիզիկական վարժությունները նվազեցնում են բետա-ամիլոիդի նստվածքները Ալցհեյմերի հիվանդության մոդել ունեցող մկների մոտ։ Ենթադրվել է, որ դա կարող է կապված լինել իրիսին հորմոնի մակարդակի բարձրացման հետ։ Այն կարգավորում է գլյուկոզայի եւ լիպիդների փոխանակումը ճարպային հյուսվածքում, ինչպես նաեւ ավելացնում է էներգիայի ծախսը։ Փորձերը ցույց են տվել, որ հորմոնի մակարդակներն իջած են դեմենցիա ունեցող պացիենտների մոտ։

Պարզելու համար, թե արդյոք պատճառահետեւանքային կապ կա բետա-ամիլոիդի մակարդակի իջեցման եւ ֆիզիկական ակտիվության միջեւ, գիտնականներն ստուգել են հորմոնի ազդեցությունը մարդու բջջային կուլտուրայի իրենց ստեղծած 3D-մոդելի վրա Ալցհեյմեի հիվանդության դեպքում։

Իրիսինով բջիջների մշակումը հանգեցրել է բետա-ամիլոիդների նստվածքների զգալի նվազման։ Այս էֆեկտը կապված է եղել նեպրիլիզինի՝ այն սպիտակուցի ակտիվության ավելացման հետ, որն արտադրվում է ուղեղի աստրոցիտ բջիջների կողմից եւ կարող է քայքայել բետա-ամիլոիդը։

Նախորդ հետազոտությունները ցույց են տվել, որ մկների մոտ արյան շրջանառության մեջ մտցված իրիսինը կարող է թափանցել ուղեղ, ինչն այն պոտենցիալ առումով Ալցհեյմերի հիվանդության օգտակար թերապեւտիկ միջոց է դարձնում։ 

Հետևեք NEWS.am Medicine-ին Facebook-ում և Twitter-ում