Լոնդոնի համալսարանական քոլեջի գիտնականները մշակել են ձվարանների քաղցկեղի ախտորոշման նոր, առավել ճշգրիտ թեստ: Այդ թեստի շնորհիվ կարելի է հետազոտել երկու անգամ ավելի շատ կին՝ ժամանակակից բժշկության այլ թեստերի համեմատ:
Գիտնականների կողմից մշակված նոր տեխնոլոգիան չափում է CA125 սպիտակուցի մակարդակն արյան մեջ: Նշենք, որ այս սպիտակուցի պարունակության մակարդակն անմիջականորեն կապված է քաղցկեղի այս տեսակի հետ: Այնուհետեւ օգտագործվում է ստացած տվյալների վերծանման համար նախատեսված համակարգչային ծրագիրը, որը կանխատեսում է քաղցկեղի զարգացման հավանականությունը տարբեր գործոնների հիման վրա՝ ներառյալ տարիքը, սպիտակուցի սկզբնական մակարդակը եւ դրա փոփոխությունները ժամանակի ընթացքում:
Նոր այս մեթոդի միջոցով ձվարանների քաղցկեղի ախտորոշման ծրագրի շրջանակներում հիվանդությունը ճշգրիտ ախտորոշվել է կանանց 86 տոկոսի մոտ: Ընդ որում՝ մնացած մի քանի մեթոդների միջոցով արված ախտորոշումը ճիշտ էր դեպքերի միայն 41-48 տոկոսում: Այդ պատճառով, հավանական է, որ, շնորհիվ այս նոր մեթոդի, աշխարհի շատ երկրներում մի քանի տարի անց կմեկնարկի լայնամասշտաբ կանխարգելման ծրագիր: Մինչեւ վերջրես դա հնարավոր չէր, քանի որ ձվարանների քաղցկեղի սքրինինգի եւ ախտորոշման մեթոդներ պարզապես գոյություն չունեին:
Ձվարանների քաղցկեղը կանանց շրջանում մահվան դեպքերի ցուցանիշով հինգերորդն է, այս հիվանդությամբ տառապող կանանց 5 տոկոսն ախտորոշումից հետո 5 տարուց պակաս է ապրում: Հավանաբար, դա կապված է այն հանգամանքի հետ, որ ձվարանների քաղցկեղը հիմնականում շատ ուշ է ախտորոշվում:
Ձվարանների քաղցկեղը մի շարք ախտանիշներով է բնութագրվում՝ ներառյալ մեջքի հատվածի ցավերն ու աղեստամոքսային համակարգի խնդիրները: Եթե այս ցավերը շատ երկար չեն անցնում, իսկ կնոջ մոտ նաեւ անբացատրելի հոգնածություն ու քաշի կորուստ է ի հայտ գալիս, պետք է անհապաղ դիմել բժշկի:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր