Հունվարի 14-ի ժամը 10.00-ի տվյալներով` սուր շնչառական վարակներով ստացիոնար դիմելիությունը կազմել է 948 դեպք, որից 796-ը` 0-18 տարեկան: Թոքաբորբով հոսպիտալացվածները 422-ն են, որից 199-ը` 0-18 տարեկան։ Սուր շնչառական վարակներով եւ թոքաբորբերով հոսպիտալացվել է 144 հղի։ Վերակենդանացման բաժանմունքներում բուժում է ստանում 92 հիվանդ։ Այս մասին հայտնում է ՀՀ Առողջապահության նախարարությունը։
Երեկ «Էրեբունի» բժշկական կենտրոնում մահացել է 1954թ. ծնված կին, ով տառապում էր սրտի իշեմիկ հիվանդությամբ, ուներ շաքարային դիաբետ։ Կնոջ մոտ հաստատվել էր գրիպի Ա տեսակի H1N1 ենթատեսակը։
Տեղեկացնենք, որ «Սուրբ Գրիգոր Լուսավորիչ» բժշկական կենտրոնում մահացած ծննդկանի մոտ լաբորատոր հետազոտությամբ գրիպի Ա տեսակի H1N1չի հայտնաբերվել։ 28 շաբաթական հղիության ժամանակ կեսարյան հատմամբ ծննդալուծված կնոջ վիճակը տեւական ժամանակ ծայրահեղ ծանր էր։
H1N1 վարակից արձանագրվել է մահվան 11 դեպք, որից 3-ը` 2015 թվականին, ասվում է ՀՀ Առողջապահության նախրարության հաղորդագրության մեջ։
Նշենք, որ երկու օր առաջ՝ հունվարի 12-ին, Հայաստանի առողջապահության նախարարությունը հայտարարել էր հիվանդության «նահանջելու» մասին՝ նշելով, որ թոքաբորբով հիվանդների թիվը կրճատվել է հասնելով 396-ի: Վերակենդանացման բաժանմունքներում գտնվող հիվանդների թիվը 92-ից նվազել է 81-ի, հղի հիվանդների թիվը 101-ից նվազել է 85-ի, որից հետո նորից կրճատվել է մինչեւ 78-ի, իսկ հիվանդ երեխաների թիվը 720-ից կրճատվել է 684-ի:
Հունվարի 12-ի դրությամբ, 14 հիվանդ միացված է եղել արհեստական շնչառության ապարատին, որոնցից 8-ի մոտ հաստատվել է H1N1 գրիպ:
Նույն տրամաբանությամբ, այսօրվա տվյալները վկայում են հիվանդության «առաջխաղացման» մասին, բայց այդ մասին Առողջապահության նախարարության հաղորդագրությունում ոչինչ չի ասվում:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր