Նիդերլանդացի ուրոլոգը՝ հայ մասնագետների մասին

Ի՞նչ կարծիք ունեն օտարերկրացի մասնագետները հայաստանցի ուրոլոգների մասին: Այդ հարցի շուրջ NEWS.am Medicine-ի թղթակիցը զրուցել է ուրոլոգ Ջոն Հեեսաքերսի (Նիդերլանդներ) հետ:

Ջոն Հեեսաքերսին դուր է գալիս այն, որ հայ ուրոլոգները միշտ հետաքրքրվում են ոլորտի բոլոր նորություններով, իրենց սովորական առօրյաին չառնչվող նորույթներով: Հայ ուրոլոգները, մասնագետի խոսքով, միշտ պատրաստ են սովորելու եւ նոր գիտելիքներ ձեռք բերելու, եւ այդ փաստը հարգանքի է արժանի:

«Կարծում եմ, որ հայ ուրոլոգների մտածելակերպը, տեխնիկական հմտությունները եւ գիտելիքները բարձր մակարդակի են», - ասել է Ջոն Հեեսաքերսը:

Նա նշել է նաեւ, որ երկու տարին մեկ Ուրոլոգների Եվրոպական Ասոցիացիայի անդամները այցելում են Հայաստան՝ իրենց փորձով կիսվելու եւ ոլորտի նորությունները ներկայացնելու նպատակով: Այդ այցելությունները, նրա կարծիքով, նույնպես նպաստում են երկրում ուրոլոգիայի պատշաճ մակարդակի ապահովմանը: Դա էլ Հեեսաքերսին հիմք է տալիս մտածելու, որ բոլոր այն նորույթները, որոնք դեռ չկան Հայաստանում, մոտ ապագայում արդեն հասանելի կլինեն:

Ջոն Հեեսաքերսը Հայաստան է ժամանել Հայաստանի ուրոլոգների ասոցիացիայի 16-րդ կորգրեսում մասնակցելու համար: Նա զեկույցներ է կարդացել գերակտիվ միզապարկի, կանացի սեռական դիսֆունկցիաների եւ ցավոտ միզապարկի սինդրոմի մասին: