Հայ հիվանդները շուտով ստիպված չեն լինի արտասահման գնալ ճառագայթային բուժման համար

Հայաստանի Ուռուցքաբանության ազգային կենտրոնն ու իրանական Varan Parto Darman ընկերությունը սեպտեմբերի 29-ին համագործակցության մասին Հուշագիր են ստորագրել: Հռուշագիրը ստորագրել են Ուռուցքաբանության ազգային կենտրոնի տնօրեն Արմեն Տանանյանը եւ իրանական ընկերության տնօրեն Մոհամադ Հոջաթփանահը (Mohammad Hojatpanah):

Varan Parto Darman ընկերությունը Իրանում ամերիկյան Varian Medical Systems ընկերության էքսկլյուզիվ ներկայացուցիչն է, իսկ վերջինն աշխարհում առաջատարն է ճառագայթային թերապիայի, ռադիովիրաբուժության, պրոտոնային թերապիայի ու բրախիթերապիայի համար նախատեսված բուժսարքավորումների ու ծրագրային ապահովման արտադրության ոլորտում:

NEWS.am Medicine -ի թղթակցի հետ զրույցում Varan Parto Darman ընկերության ներկայացուցիչ Կարեն Վարտանովը պարզաբանել է, որ Varan Parto Darman-ը նախաձեռնել է Հայաստանում Varan Armenia ընկերության ստեղծումը, որն իր հերթին լինելու է Հայաստանում Varian Medical Systems –ի էքսկլյուզիվ ներկայացուցիչը: «Ուռուցքաբանության ազգային կենտրոնի հետ համագործակցությունը սկսվելու է կենտրոնի աշխատակիցներին Varian սարքավորումների հետ աշխատել սովորեցնելուց: Նոյեմբերին այդ նպատակով նրանք Թեհրան կայցելեն, ու այդ ամենը կազմակերպվելու է իրանական կողմի գումարներով»,- պատմել է նա: Դրանից հետո նորից իրանական կողմի ներդրումների շնորհիվ «Varan Հայաստանը» կես տարվա ընթացքում ճառագայթային թերապիայի համար նոր սարքավորումներ կստանա ամերիկյան Varian –ից։ «Սարքավորումը էժան չէ, այն մոտ 4-5 մլն եվրո արժե»,- նշել է նա։

NEWS.am Medicine-ի թղթակցի հետ զրույցում Ուռուցքաբանության ազգային կենտրոնի տնօրեն Արմեն Տանանյանը նշել է, որ այսօր կենտրոնը վերածնվում է՝ հին շենքը վերանորոգվում է, վերազինվում ամենաարդիական սարքավորումներով: «Այսօրվա ամենաարդիական խնդիրներից մեկը ճառագայթային բժշկության մակարդակի բարձրացումն է: Կենտրոնում ( այսինքն Հայաստանում) հիմա չորս սարքավորում կա, որոնցից մեկը Elekta ընկերության արտադրանքն է, որը եղածներից ամենաժամանակակիցն է: Բայց ավելի հզոր սարքավորումների անհրաժեշտություն էլ կա»- նշել է նա:

Արմեն Տանանյանի խոսքով առաջին փուլում Հուշագիրը նախատեսում է բուժանձնակազմի որակավորման բարձրացում, համատեղ գիտաժողովների կազմակերպում եւ այլն: «Երկրորդ փուլով Ուռուցքաբանության կենտրոնը կստանա Varian ընկերության սարքավորումը, որը ամբողջ աշխարհում ճառագայթային թերապիայի համար լավագույնն է համարվում, ու մեր Կենտրոնը, ինչպես այսօր հայտնեց Մոհամադ Հոջաթփանահը, վեց ամսվա ընթացքում կստանա առաջին նման սարքավորումը, իսկ եւս 3-4 ամիս հետո՝ երկրորդը»- ասել է նա:

Խոսելով այն մասին, թե ինչ դա կտա՝ Կենտրոնի տնօրենը նշեց, որ դրա շնորհիվ ուռուցքաբանական հիվանդները այլեւս ստիպված չեն լինելու բուժման համար հեռավոր ու մերձավոր արտասահման մեկնել ՝ այդ նույն Վրաստան: Իրանական կողմի հետ քննարկվել է նաեւ գների հարցը, ու ենթադրվում է որ Հայաստանում գները ամենացածրը կլինեն տարածաշրջանում: Բացի դրանից կստեղծվի հիմնադրամ, որպեսզի սոցիալապես անապահով խավերը նույնպես կարողանան բուժում ստանալ:

Իր ելույթում իրանական ընկերության ղեկավար Մոհամադ Հոջաթփանահը մի փոքր շեղվեց թեմայից ՝ նշելով որ ցավոք Հայաստանում Իրանի մասին սխալ պատկերացում կա, չնայած հարեւան երկրներ են: Այստեղ համարում են, որ Իրանը փակ երկիր է ու այնտեղ չկա ոչ մի առաջխաղացում: Մինչդեռ Իրանը բժշկության ու առողջապահության զարգացման մակարդակով տարածաշրջանի ամենաառաջադեմ երկրներից մեկն է: Իրանում օրգանների փոխպատվաստում են անում, երկիրը զարգացած դեղագործական արդյունաբերություն ունի ու Իրանում կան այն բոլոր բուժսարքավորումները, որոնք կան աշխարհում:

Ելույթների ժամանակ պարզվեց, որ այդ գործընթացը եւս մեկ մասնակից ունի ՝ Հայաստանի կուրորտաբանության ու ֆիզիկական բժշկության ինստիտուտի տնօրեն Բենիկ Հարությունյանը: NEWS.am Medicine -ի թղթակցի հետ զրույցում նա նշեց, որ վաղուց է ծանոթ Varan Parto Darman ֆիրմայի ներկայացուցիչների հետ: Երբ իրանական գործընկերների մոտ առաջացել է ճառագայթային թերապիայի ոլորտում Հայաստանի հետ աշխատելու ցանկություն, նրանք դիմել են Բենիկ Հարությունյանին, ու նույնիսկ առաջարկել են զարգացնել այդ ոլորտը նրա ինստիտուտում: Սակայն ինստիտուտի տնօրենը հրաժարվել է, նրանց ուղարկելով պրոֆիլային հաստատություն՝ Ուռուցքաբանության ազգային կենտրոն:

Հետևեք NEWS.am Medicine-ին Facebook-ում և Twitter-ում