Թոքերի քաղցկեղի յուրաքանչյուր չորրորդ դեպքը կրծքավանդակի ռենտգեն պատկերի վրա չի երեւում. հետազոտություն

Թոքերի քաղցկեղի դեպքերի 23 տոկոսն անհնար է տեսնել կրծքավանդակի ռենտգեն պատկերներում, պարզել են Լիդսի եւ Էքզեթերի համալսարանների գիտնականները: Սա նշանակում է, որ եթե հենվեն միայն ռենտգենի վրա, ապա յուրաքանչյուր չորրորդ պացիենտի մոտ հիվանդությունը ժամանակին չի ախտորոշվի:

Այսօրվա դրությամբ՝ թոքերի քաղցկեղի ախտորոշման հիմնական մեթոդն է մնում ռենտգենը: Սակայն հետազոտության հեղինակներն ընդգծում են, որ ժամանակակից բժշկությունը պետք է քիչ հենվի ռենտգենի վրա եւ ավելի շատ վստահի ախտորոշման ժամանակակից մեթոդներին, ինչպիսին է համակարգչային տոմոգրաֆիան:

Թոքերի քաղցկեղը համարվում է քաղցկեղի ամենամահաբեր տեսակներից մեկը: Միայն Մեծ Բրիտանիայում այս հիվանդության հետեւանքով տարեկան մահանում է 36 հազար մարդ, իսկ ամեն տարի ախտորոշվում մոտ 50 հազար դեպք: Բոլոր պացիենտների 1 տոկոսից պակասը կարող է 5 տարուց ավելի ապրելու հույս ունենալ: Հատկանշական է, որ ի տարբերություն շատ այլ ուռուցքների, թոքերի քաղցկեղի վերապրելիության վերաբերյալ վիճակագրությունը վերջին 40 տարում փաստացի փոփոխություն չի կրել:

Հետազոտության հեղինակները բժիշկներին կոչ են անում ախտորոշման  առաջնահերթ մեթոդների շարքից ռենտգեն հետազոտությունը բացառել: Թոքերի ուռուցքի առկայության կասկածանքով պացիենտներին ռենտգենի փոխարեն ուղարկել համակարգչային տոմոգրաֆիայի, որը գրեթե 20 անգամ թանկ է եւ ավելի շատ ժամանակ է պահանջում:

Հետևեք NEWS.am Medicine-ին Facebook-ում և Twitter-ում