Հոնկոնգյան գրիպը Հայաստան կարող է գալ Ռուսաստանից մեկ ամիս անց. ԱՆ մասնագետ

Հայաստան հոնկոնգյան գրիպը կհասնի շուրջ մեկ ամիս անց՝ Ռուսաստանում տարածվելուց հետո, սակայն անհանգստանալու եւ խուճապի մատնվելու կարիք չկա: Այս մասին այսօր՝ հոկտեմբերի 21-ին կայացած մամուլի ասուլիսում հայտարարեց ԱՆ հիվանդությունների վերահսկման եւ կանխարգելման ազգային կենտրոնի հատուկ վտանգավոր եւ օդակաթիլային վարակների համաճարակաբանության բաժնի պետ Լիանա Թորոսյանը:

Նրա խոսքով՝ մարդու համար ոչ մի նշանակություն չունի, թե հատկապես գրիպի ինչ վիրուսով է վարակվում՝ գրիպի А տեսակի H1N1, H3N2 ենթատեսակներով, թե B տեսակի շտամներով: Գրիպի բոլոր տեսակները միանման են տարածվում՝ օդակաթիլային ճանապարհով, եւ ախտահարում են միեւնույն օրգանային համակարգերը, ունեն բացառապես նույն կլինիկական նշանները եւ միանման են բուժվում: Գլխավորը ժամանակին մասնագետներին դիմելն ու նրանց հրահանգներին հետեւելն է: Իսկ վիրուսի տեսակների նույնականացումը, ըստ նրա, հետաքրքրում է միայն համաճարակաբաններին:

Լիանա Թորոսյանը նշեց, որ գրիպի բոլոր տեսակները կարող են միանման թեթեւ կամ բարդացումներով ընթանալ, իսկ շատ բան կախված է ինչպես հիվանդի պահվածքից, այնպես էլ ուղեկցող հիվանդությունների առկայությունից: Մասնագետը հավելեց, որ հիմնականում բարդացումներ են լինում քրոնիկական հիվանդություններ ունեցող մարդկանց շրջանում: Անկախ տեսակից՝ գրիպի նենգությունը հատկապես այն է, որ այն հրահրում է մարդու հիմնական հիվանդությունը, եւ այն սկսում է գլուխ բարձրացնել:

Ըստ մասնագետի՝ հենց այդ պատճառով քրոնիկական հիվանդություններով մարդիկ կամ տարեցները, երեխաները եւ հղիները, որոնց դիմադրողականությունը ցածր է, գրիպի եւ շնչուղիների սուր ինֆեկցիաների շրջանում պետք է առանձնահատուկ զգույշ լինեն:

Հիշեցնենք, որ ռուս մասնագետների կանխատեսումներով՝ հոնկոնգյան գրիպը Ռուսաստան կներթափանցի ձմռանը, հիվանդության բռնկում է սպասվում ամանորյա տոների ավարտին:

Հոնկոնգյան գրիպի հարուցիչն է А (H3N2) տեսակի վիրուսը: Այս հիվանդության մասին առաջին անգամ հայտնի է դարձել 1968 թվականին, երբ Հոնկոնգում գրիպի համաճարակ է սկսվել, որից հետո այն տարածվել է նաեւ ուրիշ երկրներում: Վիրուսի շտամը հանկարծակի է երեւան եկել եւ, ինչպես հետո է պարզվել, եղել է թռչունների շրջանում տարածված գրիպի վիրուսների փոխակերպում: Մահվան ելքով դեպքերի մեծ մասը բաժին է ընկել ԱՄՆ-ին, այնտեղ 1970-ական թվականներին վիրուսի հետեւանքով մահացել է 33 հազար 800 մարդ:

1968 թվականի համաճարակից հետո А (H3N2) տեսակի գրիպի վիրուսների շրջանառությունը բազմիցս գրանցվել է հյուսիսային կիսագնդում (անցյալ տարի դա А/Switzerland/9715293/2013 (H3N2) շտամն էր), բայց դրանք զանգվածային հիվանդացություն չեն առաջացրել: Իսկ այս տարի տարածաշրջանին վիրուս է սպառնում, որը նկատվել է Հոնկոնգում (2014 թվականին), եւ ունի փոքր-ինչ այլ հակագենային կառուցվածք, եթե համեմատենք նախորդ շտամի հետ, հետեւաբար հյուսիսային կիսագնդի բնակիչների իմունիտետին այն ծանոթ չէ:

Հետևեք NEWS.am Medicine-ին Facebook-ում և Twitter-ում