• Latest news

«Այս հիվանդների համար փոխպատվաստումը կյանքի ճանապարհ է». Հայաստանում առաջին անգամ ոսկրածուծի փոխպատվաստում է կատարվել

10 ապրիլի, 2017  15:41

Հայաստանում այսօր՝ ապրիլի 10-ին առաջին անգամ արյան չարորակ հիվանդությամբ՝ միելոմայով տառապող երկու հիվանդների ոսկրածուծի ցողունային բջիջների փոխպատվաստում է կատարվել:

Առաջին հիվանդը 50-ամյա կին է Արցախից: Պրոֆեսոր Յոլյանի անվան Արյունաբանական կենտրոնի տնօրեն Սմբատ Դաղբաշյանը լրագրողներին պատմել է, որ անցյալ տարի հիվանդը քիմիաթերապիա է ստացել, որն ակնկալվող արդյունքը չի տվել: Նրան փոխպատվաստում է նշանակվել, ինչի համար հիվանդը պետք է արտերկիր մեկներ: Սակայն կինը որոշել է իր բուժումը վստահել տեղացի մասնագետներին. արյունաբանական կենտրոնն այդ ժամանակ արդեն կառուցված էր, իսկ մասնագետները՝ Եվրոպայում վերապատրաստված, որոնք պատրաստ էին Հայաստանում առաջին անգամ նման գործողություն կատարել:

Երկրորդ հիվանդը Հայաստանից տղամարդ է: Նրա կինը լրագրողներին պատմել է, որ ամուսինը հիվանդ էր շուրջ մեկ տարի, ուժեղ ցավերը տանջել են նրան, հաճախ կոտրվածքներ է ունեցել: Դեղորայքի օգնությամբ նրան «ոտքի են կանգնեցրել», իսկ փոխպատվաստումը հնարավորություն կտա նորմալ կյանքի վերադառնալ:

«Այս հիվանդների համար փոխպատվաստումը կյանքի ճանապարհ է: Դա նրանց կյանքը երկարացնելու միակ միջոցն է»,- նշել է Սմբատ Դաղբաշյանը:

Նա հավելել է, որ առաջին երկու փոխպատվաստումը կատարվել է Համբուրգ-Էպենդորֆի կլինիկայի փոխպատվաստման բաժանմունքի ղեկավար, պրոֆեսոր Նիկոլաուս Կրեգերի գլխավորությամբ: Հետագայում հայ մասնագետները կկարողանան նաեւ ինքնուրույն կատարել գործողությունը:

Նիկոլաուս Կրեգերն իր հերթին նշել է, որ ցողունային բջիջների փոխպատվաստումն արյունաբանական հիվանդությունների բուժման կարեւոր մաս է, եւ այս մեթոդը հսկայական պոտենցիալ ունի: Այն, իհարկե, բարդ է, եւ ինչպես թանկարժեք սարքավորումներ, այնպես էլ բուժանձնակազմի գիտելիքներ ու հմտություն է պահանջում:

Մասնագետի հավաստմամբ՝ աուտոփոխպատվաստում (հենց հիվանդի բջիջների օգտագործմամբ) կատարելն ավելի դյուրին է, քան ալլոփոխպատվաստում (դոնորական բջիջների օգտագործմամբ), այդ պատճառով խորհուրդ է տրվում սկսել առաջինից, իսկ երբ պրոցեսը հարթ ընթանա, կարելի է անցնել դոնորական ցողունային բջիջների փոխպատվաստմանը:

Մասնագետը հիշեցրել է, որ ցողունային բջիջների փոխպատվաստումը երկարատեւ գործընթաց է, որը կարող է մի քանի շաբաթ տեւել: Փոխպատվաստումն ընդհանուր գործընթացի ոչ մեծ մասն է միայն, որը երկարատեւ նախապատրաստում է ենթադրում, ինչպես նաեւ երկարատեւ բուժում եւ հիվանդի վերականգնում:

«Այսօր առաջին հիվանդներն էին: Սա Հայաստանում ցողունային բջիջների փոխպատվաստման մեկնարկն է: Առջեւում թռիչներ եւ անկումներ են սպասվում, բայց վստահ եմ, որ թռիչքներն ավելին կլինեն»,- ասել է պրոֆեսոր Կրեգերը:

Սմբատ Դաղբաշյանն իր հերթին հիշեցրել է, որ ամեն տարի Հայաստանում շուրջ 60 հիվանդ ոսկրածուծի ցողունային բջիջների փոխպատվաստման կարիք է ունենում: Այս տարի ծրագրվում է 7-10 նման գործողություն կատարել: Բացի այդ՝ չի բացառվում, որ հայ մասնագետներին կսկսեն դիմել նաեւ հիվանդներ հարեւան երկրներից:

Հետևեք NEWS.am Medicine-ին Facebook-ում և Twitter-ում


 
  • Տեսանյութեր
 
 
  • Իրադարձությունների օրացույց
 
 
  • Արխիվ
 
  • Ամենաընթերցվածը

ամիս

շաբաթ

օր

 
  • Հետեվեք մեզ Ֆեյսբուքում
 
  • Հարցում
Տեղյա՞կ եք արդյոք, որ 2027թ.–ից ՀՀ բոլոր քաղաքացիների համար պարտադիր է դառնալու բժշկական ապահովագրությունը
Տեղյակ եմ եւ կողմ եմ
Տեղյակ եմ եւ դեմ եմ
Տեղյակ եմ, դեռեւս չեմ կողմնորոշվում
Տեղյակ չեմ, բայց սկզբունքորեն կողմ եմ
Տեղյակ չեմ, բայց սկզբունքորեն դեմ եմ
Ինձ համար միեւնույն է