• Latest news

Վակուումային ստերեոտակտիկ բիոպսիա. կրծքի անհարկի վիրահատություններից խուսափելու հնարավորություն

20 հուլիսի, 2017  14:48

«Աստղիկ» բժշկական կենտրոնում ներդրել են կրծքագեղձի վակուումային ստերեոտակտիկ բիոպսիայի տեխնոլոգիան, որի օգնությամբ հնարավոր է կարեւոր տեղեկություններ ստանալ կրծքագեղձում կրակալման օջախների՝ միկրոկալցիֆիկատների վերաբերյալ: Ինչպես NEWS.am Medicine-ի թղթակցի հետ զրույցում նշեց Հայդելբերգի համալսարանական կլինիկայի գլխավոր բժիշկ, պրոֆեսոր Քրիստոֆ Զոնը, այս գործողության շնորհիվ կարելի է զգալիորեն կրճատել կրծքագեղձի ոչ անհրաժեշտ վիրահատությունների թիվը. եթե միկրոկալցիֆիկատները բարորակ են, դրանք հեռացնելու անհրաժեշտություն չկա:

Մասնագետի պարզաբանմամբ` կրծագեղձի քաղցկեղի բուժման կազմակերպման մեջ բիոպսիայի դերի կարեւորությունը չի կարելի թերագնահատել. այն օգնում է հասկանալ ոչ միայն հիվանդի մոտ գոյացության բարորակ կամ չարորակ լինելու բնույթը, այլեւ, կողմնորոշվել հետագա բուժման հարցում կամ հասկանալ, թե հատկապես ինչպիսի վիրահատություն պետք է կատարվի, եթե այն անհրաժեշտ է:

Սակայն Հայաստանի կլինիկաներից շատերում, ինչպես նշեց մասնագետը, բիոպսիան հաճախ անտեսում են, իսկ շատ հիվանդների առաջարկում են գոյացությունը «համենայնդեպս» հեռացնել: Արդյունքում` վիրաբույժները շատ հաճախ հեռացնում են բարորակ գյացությունները, որոնց ձեռք տալու կարիք չկար: Չի կարելի այսպես վարվել, պնդում է  Քրիստոֆ Զոնը:

«Ամբողջ աշխարհում, զարգացած բոլոր երկրներում այսօր աշխատում են վիրահատություններ կատարել միայն չարորակ ուռուցքների դեպքում: Հայաստանի որոշ հիվանդանոցներում բժիշկները հիվանդներին ասում են, որ իրենց ուռուցքը կարող է չարորակի վերափոխվել, ուստի այն պետք է վիրահատել, սակայն դա ճիշտ չէ. բարորակ գոյացությունները, որպես կանոն, չեն կարող չարորակի վերափոխվել»,- պարզաբանեց մասնագետը:

Բարորակ գոյացությունը չարորակից տարբերակելու եւ հասկանալու համար` կոնկրետ դեպքում վիրահատության կարիք կա, թե ոչ, անհրաժեշտ է բիոպսիա կատարել: Եթե հիվանդի մոտ այնպիսի նորագոյացություն է, որը կարելի է շոշափել կամ տեսնել ուլտրաձայնով, նրան կարող է կատարվել սովորական բիոպսիա: Իսկ եթե նրա կրծքում միկրոկալցիֆիկատներ են առկա` կրային նստվածքների ոչ մեծ օջախներ, որոնք չեն երեւում ո´չ ՈւՁՀ-ով, ո´չ ՄՌՏ-ով, ապա կպահանջվի վակուումային ստերեոտակտիկ բիոպսիա` մամոգրաֆիայի վերահսկողության ներքո:

Այս գործողության կատարման համար թանկարժեք սարքավորում է անհրաժեշտ, որն այս տարվա սկզբին «Աստղիկ» ԲԿ-ն ձեռք է բերել: Գործողությունն արդյունավետորեն կատարելու համար կենտրոնի մամոգրաֆիայի ծառայության ղեկավար Նունե Մաշուրյանը վերապատրաստում է անցել Հայդելբերգի համալսարանական կլինիկայում: Դրանից բացի, գերմանացի մասնագետները մի քանի անգամ Հայաստան են եկել, որ տեղ բժիշկներին օգնեն ավելի լավ յուրացնել սարքավորումը: Հենց այդ նպատակով էլ հերթական այցով հուլիսի 9-14--ին Քրիստոֆ Զոնը կրկին Հայաստանում էր: NEWS.am Medicine-ի հետ զրույցում նա նշեց, որ ինքը «Աստղիկ» ԲԿ է գալիս տարեկան 3-4 անգամ, իսկ մնացյալ ամբողջ ժամանակ տեղի բժիշկների հետ մշտապես կապի մեջ է:

Անհարկի  վիրահատությունները  չարիք են

NEWS.am Medicine-ի թղթակցի հետ զրույցում «Աստղիկ» ԲԿ-ի ուռուցքաբան վիրաբույժ Գեւորգ Ասիլբեկյանը նշեց, որ ցանկացած վիրահատություն, նույնիսկ «ամենաանմեղը», հիվանդի համար վտանգներ է պարունակում:

«Ինչո՞ւ հենց այնպես, առանց որեւէ անհրաժեշտության ռիսկի դիմել, անգամ եթե այն փոքր է: Ոչ մեծ բարորակ ուռուցքները հեռացնելու կարիք չկա. այդպիսի ուռուցքներ կան կանանցից շատերի մոտ, եւ ոչ մի խնդիր չեն ստեղծում»,- պարզաբանեց մասնագետը:

Բարորակ ուռուցքներն առանց անհրաժեշտության չի կարելի հեռացնել մեկ այլ պատճառով եւս. Նունե Մաշուրյանի պարզաբանմամբ` վիրահատությունից հետո հիվանդի մոտ սպիներ են մնում, որը ոչ միայն կոսմետիկ խնդիր է, այլեւ դժվարացնում է ռադիոլոգի աշխատանքը, քանի որ սպիների տակ ուռուցքը տարբերակելը դժվար է:

Բարորակ ուռուցքը կարո՞ղ է չարորակի վերափոխվել

Հիվանդներից շատերն են վախենում բիոպսիա կատարելուց, քանի որ կարծում են, որ նման գործողությունից հետո բարորակ ուռուցքը կարող է չարորակի վերափոխվել, իսկ չարորակը կարող է արագ տարածվել:

Այս կարծիքը ընդամենը առասպել է, պնդում են Նունե Մաշուրյանը եւ Գեւորգ Ասիլբեկյանը: Բարորակ ուռուցքը չի կարող չարորակ դառնալ ո´չ բիոպսիայի հետեւանքով, ո´չ ընդհանրապես: Ֆիբրոադենոմաների միայն որոշ տարատեսակներ կան, որոնք կարող են չարորակ ուռուցք դառնալ, եւ բժիշկը կարող է դրանք հեռացնելու որոշում ընդունել: Նման ֆիբրոադենոմաները անմեղ ուռուցքներից տարբերակելու հարցում նույնպես կարող է բիոպսիան օգնել:

Բիոպսիայից հրաժարվելով` հիվանդները կա´մ ոչ անհրաժեշտ վիրահատությունների են ենթարկվում, կա´մ խնդիրն անտեսում են` բժշկի դիմելով արդեն չափից ավելի բարձիթողի վիճակում:

Ինչպե՞ս  է  անցկացվում վակուումային ստերեոտակտիկ  բիոպսիան

«Աստղիկ» ԲԿ-ի մամոգրաֆիայի ծառայության ղեկավար Նունե Մաշուրյանը նշեց, որ հիվանդը նստում է մամմոգրաֆի մոտ, եւ մասնագետը հետազոտելով նրա կրծքագեղձը` ընտրում է այն անհրաժեշտ տեղը, որտեղից պետք է հյուսվածքների նմուշներ վերցվեն: Հաշվարկներ կատարելիս նրան համակարգիչն է օգնում: Ընտրվում է օգտագործվող ասեղի չափը: Սարքը կրծքի վրա գտնում է անհրաժեշտ տեղը եւ անհրաժեշտ խորությունը, որտեղից էլ վակուումի միջոցով նմուշը վերցվում է: Նմուշը հոյուսվածքաբանական հետազոտության ուղարկելուց առաջ եւս մեկ անգամ զննում են մամոգրաֆի միջոցով` համոզվելու համար, որ այնտեղ միկրոկալցիֆիկատներ կան։ Հյուսվածքաբանը, նմուշը հետազոտելով, արդեն եզրակացություն է տալիս դրա բնույթի մասին:

Կրծքագեղձի այն տեղում, որտեղից նմուշ է վերցվել, մասնագետը հատուկ կլիպ մարկեր է տեղադրում: Հիվանդը դա չի զգա, սակայն մամոգրաֆիայով հաջորդ հետազոտության ժամանակ այն մասնագետին թույլ կտա տեսնել, թե բիոպսիան որ հատվածից է կատարվել: Իսկ եթե պարզվի, որ հիվանդի մոտ չարորակ ուռուցք է, որը պետք է հեռացնել, կլիպ մարկերը վիրաբույժին կօգնի ճշգրիտ որոշել այն տեղը, որտեղ պետք է վիրահատությունը կատարվի:

Վակուումային ստերեոտակտիկ բիոպսիայից հետո հիվանդների մոտ սովորաբար ոչ մի խնդիր չի առաջանում եւ սպիներ չեն մնում:

Հետևեք NEWS.am Medicine-ին Facebook-ում և Twitter-ում


 
  • Կարդացեք նաև
 
  • Իրադարձությունների օրացույց
 
 
  • Արխիվ
 
  • Ամենաընթերցվածը

ամիս

շաբաթ

օր

 
  • Հետեվեք մեզ Ֆեյսբուքում
 
  • Հարցում
Տեղյա՞կ եք արդյոք, որ 2027թ.–ից ՀՀ բոլոր քաղաքացիների համար պարտադիր է դառնալու բժշկական ապահովագրությունը
Տեղյակ եմ եւ կողմ եմ
Տեղյակ եմ եւ դեմ եմ
Տեղյակ եմ, դեռեւս չեմ կողմնորոշվում
Տեղյակ չեմ, բայց սկզբունքորեն կողմ եմ
Տեղյակ չեմ, բայց սկզբունքորեն դեմ եմ
Ինձ համար միեւնույն է