Գիշերային աշխատանքն ու ծանրություն բարձրացնելու սովորությունը կարող են կանանց խանգարել հղիանալ

Այն կանայք, ովքեր գիշերային հերթափոխով են աշխատում կամ գործի բերումով ստիպված են ծանրություն բարձրացնել, ձվաբջիջների քիչ պաշար եւ հղիանալու հետ կապված խնդիրներ ունեն, քան նրանք, ովքեր աշխատում են 9-ից 17-ը: Այս մասին ասված է Occupational & Environmental Medicine-ում հրապարակված հետազոտությունում:

Մասաչուսեթսի վերարտադրողական առողջության կլինիկայում բուժվող միջինը 35 տարեկան 400 կանանց առողջական տվյալների վերլուծությունը միանշանակ կապ է բացահայտել էմբրիոն դառնալու ունակ որակյալ ձվաբջիջների պաշարի, հղիանալու համար կարեւոր հորմոններ մակարդակի եւ աշխատանքի պայմանների միջեւ (ֆիզիկական ծանրաբեռնվածությունն ու աշխատավայրում անցկացվող ժամանակը):

Կանանց շուրջ 40%-ն աշխատավայրում կանոնավորապես ծանր առարկաներ են շարժել կամ բարձրացրել: Ֆիզիկական աշխատանք կատարող կանանց մոտ գիտնականները ձվաբջիջների նվազ պաշար եւ ֆոլիկուլների նվազ քանակություն են հայտնաբերել: Իսկ երեկոյան կամ գիշերային հերթափոխով աշխատող կանանց մոտ այս ցուցանիշն ավելի պակաս է եղել: Ամենավատ իրավիճակը 37 տարեկանն անց եւ գիշերային հերթափոխով աշխատող կանանց մոտ է:

Չնայած այս ամենին՝ գիտնականները չեն կարող վստահաբար պնդել, որ հենց այս գործոններ են այս կանանց մոտ հղիության հետ կապված խնդիրների պատճառ դարձել:

Ձվաբջիջների պաշարի վրա կարող են ազդել նաեւ այլ գործոններ: Օրինակ՝ համարվում է, որ ծխելը բացասաբար է անդրադառնում կանանց ձվաբջիջների պաշարի եւ հղիանալու ունակության վրա:

Հետևեք NEWS.am Medicine-ին Facebook-ում և Twitter-ում