Մեծ հարց է՝ արդյոք Հայաստանին պետք էր նման կենտրոն՝ նախարարը ռադիոիզոտոպերի կենտրոնի մասին

Մեծ հարց է՝ արդյոք Հայաստանին պետք էր նման կենտրոն, թե ոչ, բայց քանի որ այն արդեն կառուցվել է, մենք պետք է  հնարավոր ամեն ինչ անենք, որպեսզի այն աշխատի: Այս մասին «Լոֆտ» սրճարանում քաղաքացիների հետ հանդիպման ժամանակ ասաց առողջապահության նախարար Արսեն Թորոսյանը՝ խոսելով ռադիոիզոտոպերի արտադրության կենտրոնի մասին:

 «Բոլորը գիտեն, որ Հայաստանում կենտրոն է կառուցվել, որտեղ կա ՊԷՏ սկան եւ այն չի աշխատում: Այն կառուցվել է պետական եւ վարկային միջոցներով եւ այդ վարկը մենք հիմա մարում ենք: Եթե անկեղծ լինենք, դեռ հարց է՝ արդյոք Հայաստանին պետք էր նման կենտրոն, բայց քանի որ այն արդեն կառուցվել է, մենք պետք է  հնարավոր ամեն ինչ անենք, որպեսզի այն աշխատի», - ասել է նախարարը:

Թորոսյանը հաղորդել է, որ ներկայումս  բանակցություններ է վարում կոնցեսիոն ընկերության հետ, որը պետք է գործարկեր այդ կենտրոնը, բայց չի արել այդ, քանի որ աշխատանքները չեն ավարտվել եւ կենտրոնը նրան չի փոխանցվել:

Նրա խոսքով, այս ընկերության հետ նախորդ իշխանությունը 15 տարի ժամկետով բացառիկ կոնցեսիոն պայմանագիր է ստորագրել եւ սա լուրջ իրավական բեռ է պետության համար:

Կոնցեսիոն ընկերության հետ բանակցությունների արդյունքում պարզ կլինեն հնարավոր որոշումները. կամ ընկերությունը կշահագործի կենտրոնը կամ այն կմասնավորեցվի կամ պետությունն այն հետ կվերցնի եւ կկառավարի: Դրանից հետո, ըստ Թորոսյանի, անհրաժեշտ կլինի որոշել կադրերի պատրաստման հարցը, ինչպես նաեւ պետք է հասկանալ, թե որքան ՊԷՏ հետազոտություն կկարողանա գնել պետությունը, քանի որ նման մեկ հետազոտությունն արժե 1000 դոլար:

Հետևեք NEWS.am Medicine-ին Facebook-ում և Twitter-ում