Ունենք հավելյալ միջոցների կարիք. Ավանեսյանը՝ օֆերտայի սկզբունքով բուժսպասարկման մասին

Առողջապահությունն ունի տարեկան բյուջե, որի շրջանակներում մենք արդեն իրականցնում ենք օֆերտայի սկզբունքով ֆինանսավորում և հերթագրումները իրականացվում են ոչ թե ամեն բժշկական կենտրոնի բյուջեի շրջանակներում, այլ ընդհանուր ծրագրին հատկացված բյուջերի շրջանակներում ամբողջ հանրապետության մասով: Այս մասին այսօր՝ ապրիլի 12-ին, կառավարության նիստից հետո  լրագրողների հետ զրույցում ասաց Առողջապահության նախարար Անահիտ Ավանեսյանը՝ անդրադառնալով պետպատվերի շրջանակում բժշկական ծառայություններ ստանալուն:

«Մենք արդեն իսկ 3 ամիսների շարժը գնահատել ենք ունենք որոշակի ծրագրերով տարեկան բյուջեից հավլյալ միջոցներ կարիք, այսօր քննարկելու ենք ֆինանսների նախարարի հետ և հասկանանք, թե ինչքան հավելյալ միջոցներ ենք հատկացնելու»,- ասաց Ավանեսյանը:

Հարցին՝ օֆերտայի սկզբունքով ֆինանսավորումը բյուջեի մասով խնդիրներ չի՞ առաջացնի, քանի որ կարող են չարաշահումներ լինել ոլորտում, Ավանեսյանը պատասխանեց՝ եղել է նման կանխատեսում:

«Կանխատեսում էինք, որ կլինեն նաև գերակատարումներ: Այդ գերակատարումների տենդենցը վերլուծվել է: Այս մասով մենք հանդիպում կունենանք ֆինանսների նախարարության հետ, և Կառավարությունը կորոշի, թե ինչպես կներդրվի հերթագրման համակարգը, և հավելյալ ինչքան միջոցներ կհատկացվեն»,- ասաց նախարարը:

Ըստ Ավանեսյանի՝ նաև կանխատեսել էին, որ 2024 թվականի բյուջեով նախատեսված, նախորդ տարվա կատարողականով ֆիքսված միջոցները որոշ ծառայությունների գծով կգերակատարվեն մինչև 20 տոկոսի չափով:

Լրագրողի դիտարկմանը, թե շատ դեպքերում չարաշահում են պետպատվերի ինստիտուտը, գուցե նաև կոռուպցիոն ռիսկեր կան այդտեղ Ավանեսյանն արձագանքեց. «Ձեր ունեցած տվյալները կխնդրեմ հանձնել իրավապահ մարմիններին: Մեր էլեկտրոնային հավելվածի միջոցով քաղաքացիները տեսնում են, թե իրենց անունով ինչպիսի ծառայություններ են դուրս գրվում, և որքան միջոց է պետությունը հատկացնում այդ ծառայության համար, պետք է լինել աչալուրջ»:

Հետևեք NEWS.am Medicine-ին Facebook-ում և Twitter-ում