Իսպանիայում Biak Bat-ը կատուներին օգտագործում է աուտիզմի և տագնապային խանգարումների բուժման համար

Իսպանիայի հյուսիսում գտնվող Ալսասուա քաղաքի Biak Bat ասոցիացիան կատուներին օգտագործում է հոգեսոցիալական և կրթական թերապիայի մեջ՝ աուտիզմ, տագնապային խանգարումներ, ինչպես նաև հոգեկան առողջության և զարգացման հետ կապված այլ խնդիրներ ունեցող մարդկանց համար։ Այս մասին «ՌԻԱ Նովոստի»-ին հայտնել է Ներեա կենտրոնի աշխատակիցը։

«Կատուները նպաստում են հուզական կարգավորման զարգացմանը, ինքնագնահատականի բարձրացմանը, զայրույթի կառավարմանը, սոցիալական հմտությունների զարգացմանը և անվտանգ կապվածությունների ձևավորմանը։ Մենք աշխատում ենք տարբեր կատուների հետ, որոնք իրենց հմտություններով և բնավորությամբ խիստ տարբերվում են միմյանցից»,- ասել է թերապևտը:

Նրա խոսքով՝ կատուները կարող են հատկապես օգտակար լինել թերապիայի մեջ՝ իրենց հանգիստ և ոչ պարտադրող վարքագծի շնորհիվ։ Կենտրոնում անցկացվում են տարբեր տեսակի պարապմունքներ. պացիենտները խնամում են կենդանիներին, խաղում նրանց հետ և կատարում վարժություններ՝ ուղղված կենտրոնացման, ինքնատիրապետման և ինքնավստահության զարգացմանը։

Թերապևտը պնդում է, որ նման պարապմունքները օգնում են մարդկանց ավելի լավ հաղթահարել սթրեսը, վերահսկել ազդակները և ձևավորել կայուն հուզական կապեր:

Կենդանիների միջոցով թերապիան ավանդաբար ավելի հաճախ անցկացվում է շների մասնակցությամբ, սակայն Biak Bat-ում կարծում են, որ կատուները կարող են օգտակար լինել պացիենտների այլ խմբերի համար: Նրանց ավելի անկախ և կանխատեսելի վարքագիծն օգնում է պարապմունքների ժամանակ ստեղծել հանգիստ մթնոլորտ:

Կենտրոնի ծրագրերը նախատեսված են տարբեր խմբերի համար՝ սկսած աուտիզմ և գերակտիվություն ունեցող երեխաներից մինչև տագնապ, սթրես կամ կյանքի դժվարին իրավիճակներ հաղթահարող մեծահասակներ: Կենտրոնի մասնագետները նաև արտագնա պարապմունքներ են անցկացնում ծերանոցներում:

Biak Bat ասոցիացիան հիմնադրվել է 2011 թվականին Ալսասուայում՝ մանկավարժներ Իոսու Մենդեսի և Խոսունե Ասպիրոսի կողմից և զբաղվում է կենդանիների մասնակցությամբ թերապիայով: Հետագայում կենտրոնը բացել է նոր տարածք՝ թերապևտիկ ծրագրերի իրականացման համար: Կենտրոնում նշում են, որ նմանատիպ պրակտիկաներն Իսպանիայում դեռևս հազվադեպ են և հետագա հետազոտությունների կարիք ունեն:

Հետևեք NEWS.am Medicine-ին Facebook-ում և Twitter-ում