Որքան ծանր է անցել օրը, այնքան երազում շատ են վախն ու տագնապը. Dreaming

Ցերեկը վերապրված սթրեսն ուղղակիորեն արտացոլվում է երազների հույզերի վրա. որքան ծանր է անցնում օրը, այնքան շատ բացասական ապրումներ՝ վախ, տխրություն, բարկություն են թափանցում գիշերային տեսիլքների մեջ: Ընդ որում, ցերեկային սթրեսը հաղթահարելու սովորական եղանակները չեն պաշտպանում դրանից: Հետազոտությունը հրապարակվել է Dreaming հանդեսում:

Հայդելբերգի SRH համալսարանի գիտնականները հետևել են 65 մասնակցի, որոնք 14 օր շարունակ գրանցել են իրենց երազները: Հավաքվել է ընդհանուր առմամբ 276 երազ: Դրանց 39%-ում արտահայտված են եղելբացասական հույզերը, իսկ մոտ 11%-ը մասնակիցներն իրենք են անվանել մղձավանջներ: Մթնշաղային երազների հետ ամենից ուժեղ կերպով կապված են եղել ֆինանսական մտահոգությունները և հարաբերությունների խնդիրները:

Շատ անսպասելի պարզվել է, որ սթրեսը ցերեկային եղանակներով հաղթահարելը չի «չեղարկում» դրա ազդեցությունը երազների վրա: Այն մասնակիցները, ովքեր հաճախ էին հենվում մտերիմների աջակցության վրա կամ փորձում էին դրականորեն մտածել, պարտադիր չէ, որ ավելի քիչ բացասական երազներ տեսնեին, քան նրանք, ովքեր ավելի նվազառողջ եղանակներով էին հաղթահարում սթրեսը:

Սա հուշում է, որ հույզերը, որոնք մենք վերապրում ենք երազում, բավականին ուղղակիորեն են արտացոլում ցերեկային սթրեսը, և կամքի ուժով «հաղթահարելով» այն չես վերացնի։ Երազը կարծես յուրովի է մշակում օրվա ընթացքում կուտակված լարվածությունը: Գործնականում սա կարևոր է․ եթե մարդուն տանջում են մղձավանջները, առաջին հերթին պետք է պայքարել սթրեսի աղբյուրի, և ոչ թե միայն հենց երազների դեմ: Հեղինակները նշում են, որ ընտրանքը փոքր է եղել՝ բաղկացած հիմնականում ուսանողուհիներից, ուստի եզրակացությունները դեռ պետք է ստուգել ավելի բազմազան խմբերի վրա:

Երազները և դրանց հուզական երանգավորումը երկար ժամանակ մնացել էին լուրջ գիտության սահմաններից դուրս, բայց այսօր դրանք ակտիվորեն ուսումնասիրվում են որպես ուղեղի և հոգեկանի աշխատանքի պատուհան: Մղձավանջներն ու տագնապալի երազները կապված են սթրեսի, տրավմաների և քնի խանգարումների հետ, իսկ դրանց հաճախականությունը կարող է լինել անբարեկեցության ազդանշան: Հասկանալը, թե ինչպես են ցերեկային ապրումները վերածվում գիշերայինների, օգնում է ավելի լավ պայքարել քնի խանգարումների դեմ:

Հետևեք NEWS.am Medicine-ին Facebook-ում և Twitter-ում