Ինչո՞վ է կոռուպցիան վտանգավոր՝ առողջապահական կրթության ոլորտում (վիդեո)

Շատերը կհամաձայնեն, որ կոռուպցիան առողջապահական եւ մանավանդ առողջապահական կրթության ոլորտում շատ ավելի վտանգավոր է, քան բոլոր այլ ոլորտներում, քանի որ այստեղ խոսքը մարդու առողջության եւ կյանքի մասին է գնում:

Այսօր՝ դեկտեմբերի 9-ին, կոռուպցիայի դեմ պայքարի միջազգային օրն է, որի կապակցությամբ NEWS.am Medicine-ի խմբագրությունը Ձեր ուշադրությանն է ներկայացնում մի տեսահոլովակ, որը ցույց է տալիս, թե ինչ կարող է լինել, երբ ապագա բժիշկը գնահատականներ եւ դիպլոմ է ստանում՝ առանց համապատասխան գիտելիքներ ունենալու՝ դասախոսներին կաշառք տալով:

Գուցե հենց այդպես են մեր երկրում հայտնվում բժիշկներ, որոնք վիրուսները բակտերիաներից չեն տարբերում, հազի ժամանակ հակաբիոտիկներ են նշանակում՝ առանց հազի իրական պատճառը պարզելու, եւ շատ-շատ այլ հարցերում թերանում են:

Կոռուպցիայի դեմ պայքարի միջազգային օրվա կապակցությամբ NEWS.am Medicine-ի խմբագրությունը ցանկանում է դիմել բժշկական բուհերի բոլոր դասախոսներին. հիշեք, որ Ձեր օգնությամբ դիպլոմ ստացող ուսանողը կարող է մեկ օր բժիշկ դառնալ, եւ գուցե հենց Դուք եւ Ձեր երեխաները նրա մոտ բուժման կամ վիրահատության գնաք:

Հիշեցնենք, որ, ինչ վերաբերում է առողջապահական ոլորտի կորուպցիային, համաձայն NEWS.am Medicine-ի հարցմանը, Հայաստանի բնակչության մեծամասնությունը կարծում է, որ երկրում այն արմատախիլ անել հնարավոր չէ։ Հարցվածների 54%-ը կարծում է, որ կոռուպցիան ոչ մի կերպ հնարավոր չէ արմատախիլ անել, 23%-ը կարծում է, որ բժիշկների աշխատավարձերի բարձրացումը կարող է նպաստել կոռուպցիայի նվազմանը, եւ եւս 23%-ը կարծում է, որ կոռուպցիան արմատախիլ անելու համար պետք է երկրում պարտադիր բժշկական ապահովագրություն ներդնել։

Հետևեք NEWS.am Medicine-ին Facebook-ում և Twitter-ում