Բժիշկները սովորաբար խորհուրդ են տալիս աբորտներից խուսափել բոլոր հնարավոր միջոցներով եւ պնդում են, թե աբորտը չարիք է: Աբորտն ինչո՞ւ է վտանգավոր եւ ի՞նչ հետեւանքներ կարող է ունենալ: Այդ մասին մեզ պատմել է գինեկոլոգ Նելլի Ավագյանը:
Ինքը` աբորտի գործընթացը վտանգավոր է
Նախ եւ առաջ խնդիրներ կարող են ի հայտ գալ աբորտի գործընթացում. օրինակ, արգանդի ամբողջականությունը խախտելու կամ դրա լորձաթաղանթը վնասելու վտանգ կա: Բացի այդ, աբորտի գործընթացում կնոջ մոտ կարող է կյանքի հետ անհամատեղելի ուժեղ արյունահոսություն սկսվել: Այսինքն, նույնիսկ եթե աբորտն անի լավ մասնագետը, ռիսկ կա, որ կինը կմեռնի պրոցեդուրայի ընթացքում:
Աբորտը կարող է անպտղության հանգեցնել
Նույնիսկ եթե աբորտը լավ է անցել, այնուամենայնիվ կարող է երկարաժամկետ հետեւանքներ ունենալ կնոջ առողջության համար, զգուշացրել են գինեկոլոգները: Օրինակ, աբորտից հետո կարող են սկսվել խրոնիկական բորբոքային գործընթացներ, որոնք կարող են երկրորդային անպտղության հանգեցնել: Բացի այդ, աբորտից հետո կնոջ մոտ կարող են հորմոնային խանգարումներ առաջանալ:
Դեղերով հղիության ընդհատումը եւս կարող է վտանգավոր լինել
Դեղերով աբորտը, մասնագետի խոսքով, ավելի անվնաս է, քան մեխանիկականը, սակայն վտանգ առկա է եւ մեկում, եւ մյուսում, նախ ոչ բոլորին է կարելի նման աբորտ անել. դրա անցկացման համար հատուկ ցուցումներ եւ հակացուցումներ կան: Երկրորդ, նույնիսկ դեղամիջոցներով աբորտից հետո կնոջ մոտ կարող է կյանքի համար վտանգավոր արյունահոսություն սկսվել: Նման խանգարումից հետո հորմոնային խախտումներ եւս հաճախ են պատահում:
Բնականաբար, աբորտ արած ոչ բոլոր կանայք են բախվել այդ խնդիրների հետ: Սակայն աբորտի մասին մտածող յուրաքանչյուր կին պիտի հաշվի առնի իր առողջության եւ կյանքի համար այդ վտանգները:
Մասնագետները հիշեցնում են, որ աբորտներից խուսափելու լավագույն միջոցը համարժեք հակաբեղմնավորիչների օգտագործումն է, որոնք այսօր առավել քան մատչելի են յուրաքանչյուրին:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր