Ռուսաստանում գրիպի եւ դրա բարդացումների հետեւանքով 503 մարդ է մահացել: Այդ մասին հայտնել է Առողջապահության նախարարության պաշտոնական ներկայացուցիչ Օլեգ Սալագայը:
Ռուսաստանի վիճակագրության ծառայության տվյալներով, սա վերջին երեք տարվա ընթացքում գրիպից մահացության առավելագույն ցուցանիշն է. միայն 2013 թվականին է գրիպի բռնկման ընթացքում զոհերի թիվն ավելի մեծ եղել` 621 մարդ: Այս տարվա հունվարի 29-ի տվյալների համաձայն, Ռուսաստանում հաստատվել է գրիպի բարդացումների պատճառով մահացության 126 դեպք: Մնացած մահերն արձանագրվել են վերջին ամսվա ընթացքում:
Ինչպես նշել է Սալագայը, ներկայումս համաճարակաբանական շեմը գերազանցվել է ընդամենը ութ շրջանում (Կարելիայում, Յակուտիայում, Հրեական ինքնավար մարզում, Նովոսիբիրսկի, Մուրմանսկի եւ Արխանգելսկի, Ալթայի եւ Կրասնոյարսկի մարզերում), մինչդեռ երկու շաբաթ առաջ, նրա խոսքով, «վերելք է արձանագրվել 68 շրջանում»:
«Մենք կարող ենք ասել, որ համաճարակային վերելքն ավարտված է եւ մեր առողջ համաքաղաքացիների համար որեւէ սպառնալիք չկա», – եզրակացրել է նա:
Ինչպես տեղեկացնում են ռուսաստանյան ԶԼՄ-ները, այսօր Ռոսպոտրեբնադզորը հաղորդել է Մոսկվայում գրիպի համաճարակի ավարտի եւ դպրոցներում, մանկապարտեզներում եւ բուժական կազմակերպություններում կարանտինային միջոցառումների վերացման մասին:
Վերջերս Ռուսաստանում գրիպով եւ ՍՇՇՎ-ով հիվանդացման նվազման մասին խոսել է նաեւ ՌԴ Ռոսպոտրեբնադզորի ղեկավար Աննա Պոպովան: Նրա խոսքով, մասնագետները հիվանդացման ցուցանիշների եւ շնչառական վիրուսների շրջանառության մեջ գրիպի մասնաբաժնի անկում են արձանագրել, նրա խոսքով, հիվանդանոց տեղափոխվածների թիվը եւս նվազել է:
Ավելի վաղ Ռուսաստանի Առողջապահության նախարարության ղեկավար Վերոնիկա Սկվորցովան հայտնել էր, որ Ռուսաստանում գրիպի համաճարակը հաղթահարվել է:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր