Ես Հայաստանից ինձ հետ բազմաթիվ նվերներ կտանեմ, որոնք ստացել եմ այս օրերին եւ շատ կցանկանայի ինձ հետ ձեր ուտեստները տանել: Այս մասին լրագրողների հետ զրույցում ասել է 2017 թվականի «Ավրորա» մրցանակի դափնեկիր, բժիշկ միսիոներ Թոմ Քաթինան՝ պատասխանելով հարցին, թե ինչ կտանի իր հետ Հայաստանից:
Նա թվարկեց, որ հայկական ուտեստներից կցանկանար իր հետ տանել՝ խորոված, ժինգյալով հաց, ինչպես նաեւ պանիր եւ լոլիկ:
Թոմ Քաթինան նաեւ հաղորդեց, որ այս անգամ Նուբայի լեռներում գտնվող հոսպիտալում իր փոխարեն ԱՄՆ-ից երկու միսիոներ բժիշկներ են մնացել: Հիշեցնենք, որ անցյալ տարի Հայաստան այցի ժամանակ նրան փոխարինել էին հայ բժիշկներ Գեւորգ Ոսկանյանը, Հայկ Հովհաննիսյանը եւ Արմինե Բարխուդարյանը:
Այսօր՝ հունիսի 9-ին, Քաթինան կնոջ՝ Նասիմայի հետ այցելեց «Հերացի» համալսարանական հիվանդանոցային համալիրի Հայրենիքի պաշտպանի վերականգնողական կենտրոն:
Հիշեցնենք, որ Քաթինան Հայաստան է ժամանել «Ավրորա 2018» մրցանակաբաշխությանը մասնակցելու համար, որը տեղի կունենա վաղը՝ հունիսի 10-ին։
Թոմ Քաթինան փրկել է հազարավոր կյանքեր՝ լինելով միակ մշտական վիրաբույժը Սուդանի մասը կազմող, սակայն այժմ պատերազմներից ավերված եւ մարդասիրական օգնությունից զրկված Նուբա լեռներում, ուր մարդասիրական օգնության մուտքն արգելված է։
«Իմ կինը շատ է ուզում հայկական խորոված փորձել». Թոմ Քաթինան Հայաստան է ժամանել
[gallery id=116]