նախընտրելի դարձնել
Վերջին 30 տարվա ընթացքում դիաբետով հիվանդ մարդկանց թիվը 4 անգամ աճել է, հայտնում է Առողջապահության համաշխարհային կազմակերպությունը: Եթե 1980-ին դիաբետով ապրող մարդկանց թիվը մոտավորապես 108 մլն էր, ապա 2014-ին նրանց թիվը մոտավորապես 422 մլն է կազմել, գրեթե` կես միլիարդ:
Առողջապահության համաշխարհային օր-2016-ին նվիրված ԱՀԿ-ի զեկույցում նշվում է նաեւ, որ այդ 422 մլն-ի մեծամասնությունը 2-րդ տեսակի դիաբետ ունի, որը կապված է անառողջ ապրելակերպի, ճարպակալման եւ սխալ սննդի հետ:
«Դիաբետով մարդկանց թվի աճը մատնանշում է ռիսկի այնպիսի գործոնների ավելացում, ինչպիսիք են ավելորդ քաշը եւ ճարպակալումը», - նշված է զեկույցում:
2012-ին դիաբետն ամբողջ աշխարհում 1.5 մլն մահերի պատճառ է դարձել, եւս 2.2 մլն մարդ մահացել է արյան մեջ գլյուկոզայի բարձր մակարդակից:
Զեկույցի համաձայն, դիաբետով մարդկանց թիվն ամբողջ աշխարհում աճում է, հատկապես` եկամտի ցածր եւ միջին մակարդակով երկրներում: Արեւելյան Միջերկրածովյան շրջանում, 2014-ի տվյալներով, չափահաս բնակչության մոտավորապես 13.7 տոկոսը դիաբետով է հիվանդ, ընդ որում 1980-ին բնակչության ընդամենը 5.9 տոկոսը դիաբետ ուներ:
«Դիաբետն այնպիսի հիվանդություն է, որն այսօր անխնա կերպով հարձակվում է: Պիտի կանգնեցնենք այդ առաջընթացը», - ասել է ԱՀԿ-ի ներկայացուցիչ Էտյեն Քրագը BBC հեռուստաալիքին տված հարցազրույցում:
