Շատ կանայք տաք եղանակն ատում են միայն այն բանի համար, որ ստիպված են լինում բաց հագուստ կրել եւ շատ ժամանակ եւ ուժեր ծախսել սափրելու եւ մոմով էպիլյացիայի վրա: Նման կանանց համար լազերային էպիլյացիան կարող է լավ ընտրություն լինել:  

Թերապեւտի օգնական Տոնիաննա Գրոմբյերը պատասխանել է մազերը լազերային եղանակով հեռացնելու վերաբերյալ 10 ամենատարածված հարցին: 

1. Ինչպե՞ս է գործում այն

Լազերային էպիլյացիայի ընթացքում մասնագետը հատուկ գործիք է օգտագործում, որը մաշկով անցնող լազերային ճառագայթի օգնությամբ վնասում է մազային ֆոլիկուլները, եւ մազերը  դադարում են աճել: 

2. Քանի՞ անգամ է պետք անել դա

Վերը նկարագրված գործընթացն ազդում է միայն մազերի աճի շրջափուլի ընթացքում, այդ պատճառով սովորաբար ստիպված են լինում այն մի քանի անգամ կրկնել: Երբեմն իդեալական արդյունք ստանալու համար բավական է լինում   3 պրոցեդուրան, երբեմն` ամբողջ 9-ը:

3. Դա արդյունավե՞տ է, անկախ մազերի որակից

Լազերային էպիլյացիան արդյունավետ է մազի ցանկացած որակի դեպքում, բայց ոչ սպիտակած մազերի: 

4. Այս պրոցեդուրայի ընթացքում ճառագայթում օգտագործվո՞ւմ է

Ոչ, միայն լազերային լույս եւ ջերմություն:

5. Ինչպե՞ս է պետք պատրաստվել այդ պրոցեդուրային

Մինչեւ պրոցեդուրան չարժե արեւի լոգանք ընդունել. Ջանացեք արեւից հնարավորինս հեռու մնալ: Արեւայրուքից հետո լազերային էպիլյացիա անելն անհամեմատ ավելի բարդ կլինի: Իհարկե, սոլյարիների մասին եւս չի կարող խոսք լինել, զգուշացրել է մասնագետը: 

Պրոցեդուրայից 3-4 օր առաջ չարժե սափրվել կամ մոմով էպիլյացիա անել: 

6. Ինչքա՞ն է տեւում էպիլյացիան

Ամեն ինչ կախված է մարմնի այն հատվածից, որը էպիլյացիայի է ենթարկվում: Եթե խոսքը թեւատակերի կամ կզակի մասին է, պրոցեդուրան կարող է ընդամենը   20 րոպե տեւել, իսկ եթե լազերով մշակվեն ոտքերը կամ թիկունքը, պրոցեդուրան կարող է մինչեւ կես ժամ տեւել: 

7. Դա ցավո՞տ է

Մասնագետի խոսքով, պրոցեդուրան «մի քիչ տհաճ է», որովհետեւ մազային ֆոլիկուլներին նյարդային վերջավորություններ են կպած: Ինքը` Գրոմբյերը շաբաթը մոտավորապես   60 նման պրոցեդուրա է անում, եւ  60 հիվանդից միայն մեկին է ցավազրկում անհրաժեշտ լինում:

8. Կա՞ն այնպիսի հատվածներ, որտեղ չի կարելի լազերային էպիլյացիա անել 

Սովորաբար լազերային էպիլյացիա չեն անում միայն այն մասերում, որոնք չեն երեւում արտաքին աչքի համար, օրինակ` քթանցքերում: Մնացած բոլոր հատվածներում, մասնագետի խոսքով, սկզբունքորեն կարելի է էպիլյացիա անել: 

9. Ինչ սպասել պրոցեդուրայից հետո

Լազերային էպիլյացիան մազահեռացման լիովին անվտանգ եւ արդյունավետ մեթոդ է համարվում: Պրոցեդուրայից հետո մաշկի վրա փոքրիկ կարմրություն կամ գրգռվածություն կարող է լինել, բայց մի քանի օրից ամեն ինչ կանցնի: Այրվածքներ եւ բշտիկներ հազվադեպ են լինում: 

10. Մազերը նորից կաճե՞ն մաշկի մշակված հատվածում 

Ինքը` Գրոմբյերն իր ոտքերի էպիլյացիա է արել մոտավորապես 10 տարի առաջ, այդ ժամանակվանից նրա մոտ ժամանակ առ ժամանակի փոքրիկ խարտյաշ մազեր են ի հայտ գալիս, որոնք ստիպված է լինում հեռացնել: Մնացած առումով նրա մաշկը շարունակում է հարթ մնալ: 

Սակայն հորմոնները կարող են չար կատակ խաղալ. հորմոնային տարբեր խանգարումների պարագայում, ինչպես նաեւ հղիությունից եւ դաշտանադադարից հետո մազերը կարող են նորից սկսել աճել: