«Նաիրի» ակնաբուժական կենտրոնում կիրառվում  են Հայաստանի համար մի քանի հազվագյուտ մեթոդաբանություններ, որոնք հնարավորություն են տալիս գլաուկոմա հիվանդությունն ախտորոշել վաղ փուլում, ինչպես նաեւ, առանց վիրահատական միջամտության բուժել աչքի ցանցաթաղանթի շերտազատումը: Այս մասին NEWS.am Medicine –ի թղթակցին պատմել է Կենտրոնի ակնաբույժ Սոֆյա Կասյանը:

Նրա խոսքով, Կենտրոնը հագեցած է աչքի հիվանդությունների ախտորոշման ու բուժման ամենաարդիական ու անհրաժեշտ  բոլոր սարքավորումներով: Կենտրոնում տրամադրվում են ակնաբուժական  բոլոր  ծառայությունները՝ ռեֆրակցիոն ու կատարակտային վիրաբուժություն, ցանցաթաղանթի ու ապակենման մարմնի հիվանդությունների, գլաուկոմայի բուժում, աչքի աճակից ապարատի հիվանդությունների վիրաբուժություն: Ընդ որում, այդ ամենն արվում է նաեւ լազերի կիրառմամբ: Բժիշկն առանձնացնում է  կենտրոնի երեք հիմնական առանձնահատկություն:

Նախ,  յուրաքանչյուր հիվանդի նկատմամբ կիրառվում է անհատական մոտեցում՝ կատարվում է մանրակրկիտ հետազոտություն`  ճշգրիտ ախտորոշման համար:

Երկրորդ,  այստեղ կիրառվում է գլաուկոմայի ախտորոշման ու բուժման նոր մեթոդ, որը մշակել է Մոսկվայի Աչքի հիվանդությունների Գիտահետազոտական Ինստիտուտը, որի հովանավորությամբ էլ հենց «Նաիրի» ԲԿ-ում բացվել է Ակնաբուժության կենտրոնը: Խոսքը ներաչքային ճնշման (ՆԱՃ) անհատական նորմայի որոշման մասին է: Այն կատարվում է  ֆլոումետր կոչվող սարքով, որը հնարավորություն է տալիս յուրաքանչյուր հիվանդի համար որոշել ներաչքային այն  ճնշումը, որի դեպքում նրա տեսողական նյարդը չի վնասվի:

Այդ հետազոտությունն օգնում է գլաուկոման ախտորոշել ամենավաղ փուլերում, երբ հիվանդությունը, մեծամասամբ, զարգանում է անախտանիշ եւ դեպքերի 30-40 տոկոսում ՆԱՃ-ը լինում է միջին վիճակագրական նորմայի սահմանում: Բացի ճշգրիտ ախտորոշումը,  այս հետազոտությունը նաեւ  գլաուկոմայի արդյունավետ բուժման հնարավորություն է տալիս:

«Նաիրի» ակնաբուժական կենտրոնի երրորդ առանձնահատկությունն այն է, որ կլինիկայում կիրառվում է աչքի ցանցաթաղանթի ռեգմատոգեն շերտազատման բուժման մեթոդ` պնեւմոռետինոպեկսիայի օգնությամբ:

Ակնաբույժը պարզաբանում է. կատարվում  է աչքի ինտրավիտրեալ ներարկում, որին հաջորդում է ցանցաթաղանթի լազերկոագուլյացիան: Այս մեթոդաբանությունը, բժշկի խոսքով, մի շարք առավելություններ ունի՝ նվազագույն ինվազիվություն, քիչ ցավ, միջամտությունն առանց ընդհանուր անզգայացման է, տեսողությունը վերականգնվում է ավելի արագ, հետվիրահատական բարդություններն ավելի քիչ են, իսկ գործողությունը  թանկարժեք չէ: Սոֆյա Կասյանի խոսքով, պնեւմոռետինոպեկսիայի արդյունավետությունը բավական բարձր է՝ ավելի քան 80 տոկոս:

[gallery id=68]