Հիդրոգելային հակաուռուցքային սպեղանին կարող է այլընտրանք դառնալ քաղցկեղի բուժման գործում օգտագործվող այլ միջոցներին:  Առայժմ այն փորձարկվել է միայն մկների վրա, բայց հեղինակները կարծում են, որ այն արդյունավետորեն կհաղթահարի նաեւ տղամարդու մոտ չարորակ նորագոյացությունները:  

Միջոցի ստեղծողներն առավելագույն հաջողություններ են արձանագրել հաստ աղիքի քաղցկեղի բուժման գործում: Ուռուցքի նման տեսակի դեմ պայքարում բժիշկները դժվարությունների են բախվում. բավականին բարդ է ամբողջությամբ հեռացնել ուռուցքը եւ վիրաբույժները ոչ միշտ են վստահ, որ իրենց հաջողվել է դա: Այդ դեպքում կարող է լուծում դառնալ դեղամիջոցներով հիդրոգելային սպեղանին:  

Այն անհրաժեշտ է տեղադրել այնտեղ, որտեղ գտնվում էր ուռուցքը. դեղամիջոցները կազդեն քաղցկեղային բջիջների վրա` ոչնչացնելով դրանք: Սպեղանին կփոխարինի քիմիաթերապեւտիկ բուժմանը, կարծում են ստեղծողները: 

Նատալի Արցը (Natalie Artz) պարզաբանել է, որ հաստ աղիքի քաղցկեղով տառապող մկների վրա փորձարկումները հաջող են անցել. որոշ դեպքերում սպեղանին օգնել է ուռուցքն ամբողջությամբ վերացնել առանց վիրահատության եւ դրա վիրահատական հեռացման կարիք չի եղել:  Իսկ այն դեպքում, երբ սպեղանի չի օգտագործվել, ուռուցքի կրկնակի առաջացման հավանականությունը 40 տոկոս է կազմել:

Նախ սպեղանին ոսկուց նանոառանցքներ է արտազատում, որոնք անհրաժեշտ են ուռուցքի ջերմային ոչնչացման համար:  Հետո քաղցկեղային բջիջների վրա ազդում են քիմիաթերապեւտիկ դեղամիջոցները, որոնք գտնվում են նանոառանցքների ներսում: Եվ վերջապես սկսում են ազդել ոսկե նանոմասնիկները, որոնք գենային թերապիայի համար ՌՆԹ զոնդեր են պարունակում. դրանք ակտիվացնում են այն գենը, որում մուտացիան հենց հաստ աղիքի քաղցկեղի զարգացում է հրահրել: Սպեղանին հեռացնելու կարիք չկա. ժամանակի հետ այն տաքանալով ինքնուրույն ներծծվում է:  

Մոտ ժամանակներս սպեղանին կփորձարկվի ավելի խոշոր կենդանիների վրա, իսկ եթե փորձարկումները հաջող անցնեն, հետազոտողներն այն կփորձարկեն նաեւ մարդկանց վրա: