ՀՀ առողջապահության նախարար Լեւոն Ալթունյանի Առողջապահության համաշխարհային կազմակերպության (ԱՀԿ) եվրոպական տարածաշրջանային ղեկավար Ժուժաննա Յակաբի հրավերով Կոպենհագեն կատարած այցի ընթացքում պայմանավորվածություն է ձեռք բերվել, որ նախարարությունում գործող աշխատանքային վեց խմբերն ուղղակի համագործակցություն ծավալեն ԱՀԿ եվրոպական տարածաշրջանի համապատասխան կառույցների հետ։ 

«Նրանք կկատարեն մեզ մոտ իրականացվող բարեփոխումների փորձաքննություն եւ անհրաժեշտության դեպքում համապատասխան առաջարկություներ կանեն»,-նշել է Լեւոն Ալթունյանը՝ ներկայացնելով այցի արդյունքները։

Ինչպես հայտնում է ՀՀ առողջապահության նախարարաությունը, այցի ընթացքում Ալթունյանն ունեցել է  բազմաթիվ հանդիպումներ եւ քննարկումներ։

ԱՀԿ-ի ներկայացուցիչներին նախարարը ծանոթացրել է Հայաստանի առողջապահության ոլորտի ներկա իրավիճակին, առկա մարտահրավերներին եւ դրանց հաղթահարման ուղիներին։

«Նրանք բավականաչափ իրազեկ էին մեր երկրի թե՛ հաջողությունների, թե՛ խնդիրների մասին։ Եվս մեկ անգամ համադրելով երկու կողմի փաստերը` համոզվեցինք, որ ներկա իրավիճակի եւ ախտորոշումների մեր տեսլականները նույնն են»,-  ասել է նախարարը։

Առկա մարտահրավերների հաղթահարման Լեւոն Ալթունյանի ներկայացրած ճանապարհը ԱՀԿ-ի եվրոպական տարածաշրջանի ղեկավարության հավանությանն է արժանացել։

Ժուժաննա Յակաբն այդ ծրագրերին կազմակերպության ողջ ներուժով ամենայն աջակցություն ցուցաբերելու պատրաստակամություն է հայտնել։