Սեռական ճանապարհով փոխանցվող հիվանդությունները անցյալ տարի ԱՄՆ-ում գրանցել են ռեկորդային բարձր ցուցանիշ: Գրանցվել է քլամիդիայի, գոնորեայի եւ սիֆիլիսի ավելի քան 2 միլիոն դեպք ամբողջ երկրում: Այս մասին գրում է Medicalxpress.com-ը:

ԱՄՆ-ի Հիվանդությունների վերահսկման եւ կանխարգելման կենտրոնի (CDC)   հրապարակած, սեռական ճանապարհով փոխանցվող հիվանդությունների հսկողության ամենամյա զեկույցում նշվում է, որ սա երբեւէ գրանցված ամենաբարձր ցուցանիշն է:

2016 թվականին գրանցվել է քլամիդիա մանրէային վարակի 1.6 միլիոն դեպք. Հիվանդությունն ազդում է թե տղամարդկանց, եւ թե կանանց վրա:

Անցյալ տարի տղամարդկանց եւ կանանց շրջանում ավելացել են նաեւ գոնորեա վարակի դեպքերը, սակայն ամենաբարձր ցուցանիշը գրանցվել է տղամարդկանց շրջանում (22 տոկոս):

Բնակչության շրջանում գոնորեայի դեպքերը հասել են 470.000-ի, որոնց մեջ մեծ մասնաբաժին են կազմում տղամարդկանց հետ սեռական հարաբերություն ունեցող տղամարդկանց դեպքերը:

Սիֆիլիսով վարակվածների թիվը 2015-ից մինչեւ 2016 թվականին հասել է 28.000-ի:

Այս վարակը տարածված է հատկապես տղամարդկանց, հիմնականում՝ նույնասեռականների, բիսեքսուալների շրջանում:

Սակայն, կանանց մոտ նույնպես 36 տոկոսով ավելացել են սիֆիլիսի դեպքերը:

Նորածինների շրջանում հայտնաբերվել է սիֆիլիսի ավելի քան 600 դեպք, որը հայտնի է որպես ծննդյան սիֆիլիս:

Այս դեպքերը նորածինների շրջանում հանգեցրել են ավելի քան 40 մահվան դեպքի եւ ծանր առողջական բարդությունների:

Փորձագետներն ասում են, որ չնայած հակաբիոտիկների հետ կապված մտահոգություններին, այս երեք սեռավարակները կարող են բուժվել դրանց  օգնությամբ:

Այնուամենայնիվ, եթե դրանք չբուժվեն, կարող են հանգեցնել անպտղության, կյանքի համար վտանգավոր ծննդաբերության, հղիների մահվան եւ ՄԻԱՎ-ի փոխանցման ռիսկի ավելացման: