Չի կարելի շնչուղիների հիվանդությունների դեպքում հակաբիոտիկների ինքնանշանակում  կատարել՝ առանց բժիշկի ցուցումների՝ պնդում է «Աստղիկ» բժշկական կենտրոնի կրծքային վիրաբուժության բաժանմունքի թոքաբան Նարե Մեսրոպյանը:

Նրա խոսքով՝ որոշ ժամանակ անց մարդու մոտ կարող է ոչ միայն շնչառական օրգանների, այլեւ այլ օրգան համակարգերի բորբոքային ավելի լուրջ պրոցես զարգանալ, եւ հակաբակտերիալ միջոցներ ընդունելու անհրաժեշտություն կառաջանա, սակայն մարդն արդեն  այս դեղամիջոցների նկատմամբ զգայուն չի լինի:

Մասնագետը NEWS. am Medicine-ի թղթակցի  հետ զրույցում նշեց, որ բրոնխիտի դեպքում, որը զարգանում  է որպես վիրուսային ինֆեկցիայի բարդություն, հակաբակտերիալ դեղամիջոցների ընդունման անհրաժեշտություն չկա, համենայնդեպս՝ վարակվելուց հետո առաջին 3 շաբաթների ընթացքում: Իհարկե, դեպքեր են լինում, երբ, որպես վիրուսային ինֆեկցիա սկսված հիվանդությունն այնուհետեւ բարդանում է՝ դառնալով բակտերիալ, եւ այդ  ժամանակ անհրաժեշտ է հակաբիոտիկներով բուժում, բայց դա կարող է որոշել միայն բժիշկը:

«Ինչո՞ւ չի կարելի վիրուսային ինֆեկցիայի ժամանակ հակաբիոտիկներ խմել: Որովհետեւ  հարուցիչները տարբեր են: Հակաբակտերիալ միջոցները վիրուսների վրա ոչ մի ներգործություն չեն ունենում, դրանք ազդում են միայն բակտերիաների վրա»,- ասաց Նարե Մեսրոպյանը:

Ինչ վերաբերում է թոքաբորբին, ապա, թոքաբանի խոսքով, այս դեպքում արդեն միանշանակ  հակաբակտերիալ թերապիա է պահանջվում, եւ ոչ միայն: Հատուկ ուշադրություն են պահանջում համակցված քրոնիկ հիվանդություններով տառապող տարեց հվանդները,  մասնավորապես՝ դիաբետով, սիրտ-թոքային անբավարարությամբ եւ այլն:

Ինչ վերաբերում է հարցին՝ արդյոք վարակի՞չ են բրոնխիտն ու թոքաբորբը, ապա Նարե  Մեսրոպյանի խոսքով՝ վարակիչ է վիրուսային ինֆեկցիան, որը բրոնխիտ եւ թոքաբորբ է առաջացրել: «Այսպիսի հիվանդի հետ մերձ շփման դեպքում հնարավոր է վարակվել վիրուսային ինֆեկցիայով, բայց ոչ հենց բրոնխիտով ու թոքաբորբով: Եվ նույնպիսի կանխարգելում է պահանջվում, ինչպիսին գրիպի եւ սուր շնչառական վիրուսային ինֆեկցիայի  դեպքում՝ հիվանդի մեկուսացում եւ հիգիենայի խիստ կանոնների պահպանում»,- ասաց նա:

Հիշեցնենք, որ կրծքային վիրաբուժության բաժանմունքը վերջերս է բացվել Աստղիկ» ԲԿ–ում։ Այն ղեկավարում է հայտնի թոքային վիրաբույժ Գեւորգ Ոսկանյանը։ Բաժանմունքը հագեցված է կրծքավանդակի հիվանդությունների թերապեւտիկ ու վիրաբուժական բուժման համար անհրաժեշտ ամեն ինչով:  Այստեղ գործնականում իրականացվում են աշխարհում կատարվող կրծքային բոլոր վիրահատությունները` հազվադեպ  բացառությամբ: