Մոսկվայում մեկնարկեց Առողջապահության համաշխարհային կազմակերպության եւ Ռուսաստանի Դաշնության առողջապահության նախարարության կողմից կազմակերպված առաջին նախարարական գլոբալ համաժողովը Տուբերկուլոզի վերացումը կայուն զարգացման դարաշրջանում խորագրով։ Համաժողովի աշխատանքներին մասնակցում է ՀՀ առողջապահության նախարար Լեւոն Ալթունյանը։

Ներկայացուցչական այս համաժողովը կոչված է համախմբման հարթակ դառնալու աշխարհի տարբեր երկներում տուբերկուլոզի գլոբալ համաճարակի կանխման։

Այդ նպատակով կշեշտադրվեն միջոլորտային համագործակցության սերտացման, գլոբալ մարտահրավերների եւ վտանգների ծագման դեպքում միջոցառումների համատեղ պլանավորման, ախտորոշիչ նյութերի, դեղամիջոցների եւ պատվաստանյութերի մշակման ոլորտում գիտահետազոտական համագործակցության զարգացման հարցերը:  Տուբերկուլոզի վերացման գործում կկարեւորվեն համակարգված եւ հետեւողական քայլերը:

Համաժողովին նախատեսվում է ստորագրել նախարարական հայտարարություն, որտեղ կամրագրվեն Կայուն զարգացման նպատակներին հասնելու եւ տուբերկուլոզի վերացման նպատակով ԱՀԿ անդամ-երկրների գործունեության հիմնական ուղղությունները: Նախարարական հայտարարությունը կհրապարակվի 2018 թվականին կայանալիք ՄԱԿ-ի Գլխավոր ասամբլեայի` տուբերկուլոզին նվիրված բարձրաստիճան հանդիպման ժամանակ:  

Համաժողովն, անշուշտ, կխթանի Կայուն զարգացման նպատակներին, մասնավորապես` մինչեւ  2030 թվականը տուբերկուլոզի հաղթահարմանը հասնելուն եւ այդ հիվանդության դեմ պայքարի ԱՀԿ ռազմավարության դրույթներն իրականացնելու նպատակով միջազգային եւ միջոլորտային համագործակցության ամրապնդմանը: