Եվրոպայի շատ երկրներում այսօր կարմրուկի բռնկումներ, երբեմն էլ համաճարակներ են գրանցվում: Անցած տարիների համեմատությամբ Հայաստանում նույնպես հիվանդացությունն աճել է, սակայն համաճարակ չկա՝ կարմրուկի դեմ բնակչության մեծ մասի պատվաստվելու շնորհիվ: Այս մասին լրագրողների հետ զրույցում ասաց Իմունոկանխարգելման ազգային ծրագրի ղեկավար Գայանե Սահակյանը:

Նա հիշեցրեց, որ 2018 թվականի սկզբից Հայաստանում գրանցվել է կարմրուկի 17 դեպք:  17 հիվանդից 14-ը կարմրուկի դեմ պատվաստված չէր, մնացած երեքը մասնակի էր պատվաստվել:

Համեմատության համար՝ Ուկրաինայում ապրիլի 16-22-ն ընկած ժամանակահատվածում 1070 մարդ հիվանդացել է կարմրուկով՝ 507 մեծահասակ եւ 563 երեխա: Ուկրաինայում 2018 թվականի սկզբից ընդհանուր հիվանդացել է 11,720 մարդ՝ 4564 մեծահասակ եւ 7156 երեխա, իսկ կարմրուկի բարդություններից մահացել է 8 մարդ՝ 6 երեխա եւ 2 մեծահասակ:

Հիշեցնենք, որ վերջերս Առողջապահության համաշխարհային կազմակերպությունը հայտարարել էր, որ 2017 թվականին Եվրոպայում կարմրուկի դեպքերի թիվը 2016 թվականի համեմատությամբ ավելացել է ամբողջ 400 տոկոսով. 2017 թվականին Եվրոպայում կարմրուկով հիվանդացել է 21 315 մարդ, գրանցվել է նաեւ մահվան 35 դեպք:

2017 թվականին կարմրուկի խոշոր բռնկումներ (100 եւ ավելի դեպքեր) գրանցվել են եվրոպական տարածաշրջանի 53 երկրից 15-ում: Անցյալ տարի ամենախոշոր բռնկումները գրանցվել են Ռումինիայում (5562), Իտալիայում (5006) եւ Ուկրաինայում (4767): Բռնկումներ են եղել նաեւ Հունաստանում, Գերմանիայում,  Սերբիայում, Տաջիկստանում, Ֆրանսիայում, Ռուսաստանում, Բելգիայում, Մեծ Բրիտանիայում, Բուլղարիայում, Իսպանիայում, Չեխիայում եւ Շվեյցարիայում:

Կարմրուկը սուր ինֆեկցիոն հիվանդություն է: Հիվանդության հիմնական ախտանիշներն են բարձր ջերմությունը, բերանի խոռոչի եւ վերին շնչուղիների լորձաթաղանթի բորբոքումը, կոնյունկտիվիտը, մաշկի բծավոր բշտիկային ցանը եւ ընդհանուր ինտոքսիկացիան: Կարմրուկի վիրուսն է Morbillivirus-ը, որը սարսափելի վարակիչ է, այն արագ տարածվում է օդակաթիլային ճանապարհով: Հաստատությունից հիվանդ մարդու հեռանալուց հետո այս վիրուսը կարող է օդում եւ մակերեւույթների վրա ապրել մինչեւ 2 ժամ:

Կարմրուկը համարվում է վարակի մեծ փոխանցվելիութամբ հիվանդություն. 10 չպաստվաստված մարդուց 9-ը հիվանդի հետ շփվելիս վարակվում է: Ներկայումս կարմրուկի կանխարգելման միակ միջոցը պատվաստումն է: