ՀՀ առողջապահության նախարար Արմեն Մուրադյանն այսօր, հունիսի 5-ին, ընդունեց ԱՄՆ պաշտպանության դեպարտամենտի վտանգների նվազեցման գործակալության (ՊՎՆԳ) ծրագրերի տնօրեն Էլիզաբեթ Ս. Ջորջի գլխավորած պատվիրակությանը:  Նախարարը բարձր գնահատեց  այս կառույցի ներդրումը երկու երկրների միջեւ համաճարակաբանության ոլորտում արձանագրված հաջողությունների գործում եւ շնորհակալություն հայտնեց ՊՎՆԳ-ի կողմից Հայաստանում իրականացվող  աշխատանքների համար:

«Վարակիչ հիվանդությունների կանխարգելման արդյունքում մեր երկրում լուրջ ձեռքբերումներ են արձանագրվել եւ գրանցված դրական ցուցանիշներով միջազգային ասպարեզում կարող ենք հպարտանալ»,-ասաց նախարարը` վկայակոչելով առողջապահական մարմինների կողմից այս ուղղությամբ կատարված վիթխարի աշխատանքը։

Արմեն Մուրադյանի գնահատմամբ` երկկողմ համագործակցության առանցքային հարցերից է կենտրոնական  լաբորատորիայի ձեւավորումը, որն իրականացվելու է Հիվանդությունների վերահսկման եւ կանխարգելման կենտրոնի ռեֆերենս լաբորատորիայի բազայի վրա:

Այս կառույցը միտված է ապահովելու միջազգային առողջապահական կանոնների պահանջներին համապատասխան  կարողություններ` լաբորատոր որակի կառավարման, կենսաանվտանգության, կենսաապահովության համակարգերի ներդրում: 

Լաբորատոր համակարգի զարգացման առումով նախարարը կարեւորեց  նաեւ մարզային լաբորատորիաների վերականգնումը եւ վերազինումը: Այդ ուղղությամբ արդեն աշխատանքներ են տարվում Շիրակի եւ Տավուշի մարզերում։ Հետագայում ժամանակակից հանրային առողջապահական լաբորատորիաներ կձեւավորվեն Լոռու, Սյունիքի եւ Գեղարքունիքի մարզերում, որոնք կապահովեն մարզային մակարդակում միջազգային պահանջներին համապատասան լաբորատոր կարողություններ: 

Արմեն Մուրադյանն ընդգծեց, որ համաճարակաբանական հսկողության համակարգի զարգացումն առողջապահության համակարգի գերակա ուղղություններից է եւ այս առումով կարեւորվում է հիվանդությունների հսկողության էլեկտրոնային համալիր համակարգի ներդրումը, որը կապահովի հիվանդության դեպքերի արագ արձագանքումը:

Էլիզաբեթ Ս. Ջորջը կարեւորեց մշտապես արդյունավետ երկխոսության եւ քննարկումների պայմաններում ընթացող պատշաճ համագործակցությունը եւ ընդգծեց, որ իրենց  հիմնական նպատակը վարակիչ հիվանդությունների կանխարգելման եւ ախտորոշման գործում Հայաստանի կարողությունների զարգացումն է:

« Մենք առավել հետաքրրքված ենք հատուկ վտանգավոր ախտածիններով եւ այս ուղղությամբ սերտորեն համագործակցում ենք Առողջապահության համաշխարհային կազմակերպության հետ»,-ասաց ԱՄՆ պաշտպանության դեպարտամենտի վտանգների նվազեցման գործակալության ծրագրերի տնօրենը։