ՀՀ առողջապահության նախարար Արմեն Մուրադյանն ընդունեց Հայաստանի Հանրապետությունում  ԱՄՆ արտակարգ եւ լիազոր դեսպան Ջոն Հեֆերնի գլխավորած պատվիրակությանը:  Այս մասին հայտնում է ՀՀ ԱՆ մամուլի ծառայությունը։

Ողջունելով հյուրերին` նախարարը շնորհակալություն  հայտնեց  ԱՄՆ կառավարությանը եւ ժողովրդին Հայաստանի առողջապահության համակարգին ցուցաբերած աջակցության եւ երկարամյա համագործակցության համար:

«Առողջապահական ոլորտում մենք մեծ անելիքներ ունենք` հաշվի առնելով անցած ճանապարհը»,- ասաց Արմեն Մուրադյանը:

Նա բարձր գնահատեց ԱՄՆ Միջազգային զարգացման գործակալության (ԱՄՆ ՄԶԳ) եւ ՀՀ կառավարության միջեւ 2010թ. օգոստոսի 6-ին ստորագրված առողջապահության եւ սոցիալական ծառայությունների արդյունավետության բարելավման շուրջ օժանդակության համաձայնագիրը, որի շրջանակում առողջության առաջնային օղակում շարունակվում է բարեփոխումների  իրականացումը, տուբերկուլոզի դեմ պայքարի, մոր եւ մանկան առողջության պահպանման, շտապ եւ անհետաձգելի բուժօգնության ծառայությունների բնագավառներում համագործակցությունը:

Նախարարը նաեւ կարեւորեց այն հայ բժիշկների դերը, ովքեր ապրում եւ  ակտիվ գործունեություն են ծավալում ԱՄՆ-ում եւ մեծ ներդրում ունեն Հայաստանի առողջապահական համակարգի տարբեր ոլորտների զարգացման գործում։ Արմեն Մուրադյանը բարձր գնահատեց նրանց մշտական կապը հայրենիքի գործընկերների հետ:

Արմեն Մուրադյանին շնորհավորելով պաշտոնավարման առթիվ`  Ջոն Հեֆերնը նշեց, որ Հայաստանում ԱՄՆ դեսպանությունը մշտապես սերտորեն եւ արդյունավետ է աշխատել ՀՀ առողջապահության նախարարության թիմի հետ: «Հայաստանում գտնվելուս ընթացքում մենք բազմաթիվ համաձայնագրեր ենք կնքել, որոնց  շուրջ ծավալվել է երկկողմ համագործակցություն: Առաջիկայում առողջապահական ծրագրերը կունենան նաեւ ստեղծարար մոտեցումներ»,- կարծիք հայտեց Հեֆերնը:

 Առողջապահության նախարարությունը սերտ եւ շարունակական համագործակցություն է ծավալել Ամերիկայի Հայ օգնության ֆոնդի, ամերիկահայ ակնաբույժ Ռոջեր Օհաննեսյանի կողմից 1992 թվականին ԱՄՆ-ում հիմնադրված «Հայկական ակնաբուժության նախագիծ» բարեգործական կազմակերպության, Ամերիկայի Միացյալ հայկական հիմնադրամի (UAF), 1997 թվականից Հայաստանում գործող հայ-ամերիկյան առողջության կենտրոնի եւ մի շարք այլ կազմակերպությունների եւ անհատների հետ: