նախընտրելի դարձնել
COVID-19 կորոնավիրուսային ինֆեկցիայով 80 պացիենտ միացված է թոքերի արհեստական օդափոխության սարքերին։ Առողջապահության նախարարությունից NEWS.am Medicine-ին հայտնեցին, որ 800 պացիենտ հիմա ծանր վիճակում է, եւս 200-ը՝ ծայրահեղ ծանր կամ ծայրահեղ։
Այսօր Հայաստանի հիվանդանոցները լեփ-լեցուն են կորոնավիրուսային ինֆեկցիայով պացիենտներով։ Ավելին՝ մի քանի հարյուր պացիենտներ հոսպիտալացման կարիք ունեն, սակայն ստիպված են հերթում սպասել, մինչեւ իրենց համար տեղ կազատվի։ Նույնիսկ շատ հիվանդանոցներ, որոնք նախապես այլ «ուղղվածություն» են ունեցել (օրինակ՝ Այրվածքների բուժման ազգային կենտրոնը), ներգրավված են կորոնավիրուսով պացիենտների բուժման գործին, ինչպես նաեւ Արցախում Ադրբեջանի ագրեսիայի հետեւանքով վիրավորների եւ տուժածների։
Ոմանք առաջարկում են պացիենտների բուժման համար օգտագործել Կարեն Դեմիրճյանի անվան մարզահամերգային համալիրի տարածքը, որտեղ համավարակի սկզբում տեղադրել էին տասնյակ մահճակալներ, բայց որոնք այդպես էլ չէին օգտագործվել։ Սակայն առողջապահության նախարար Արսեն Թորոսյանը նշել էր, որ բուժումը, որը կարելի է կազմակերպել այդպիսի վայրում, ոչ մի բանով չի տարբերվի տանը բուժվելուց, քանին որ կարեւոր է ոչ թե մահճակալների թիվը, այլ մասնագետների, ԹԱՕ սարքերի եւ այլն, իսկ այդ ամենն արդեն ներգրավված է կորոնավիրուսի դեմ պայքարում։
