Արեւային այրվածքները արեւի տակ առանց պաշտպանության չափազանց երկար մնալու ամենատհաճ վկայությունն է, բայց այն, ինչ մենք հաճախ անմիջապես չենք նկատում, դա մաշկի արագացված ծերացումն է եւ մաշկի քաղցկեղի առաջացման վտանգը, որը կարող է ուղեկցել դրան, հայտնում է CNN-ը:

«Ցավոք, մաշկի քաղցկեղի հիվանդացության մակարդակը շարունակում է աճել, եւ մենք անում ենք ամեն ինչ, որպեսզի այն նվազագույնի հասցվի, եւ արեւապաշտպան միջոցների օգտագործումը այս գործընթացի բաղադրիչն է»,- ասել է Մաունթ Սինայ Իկան բժշկական դպրոցի մաշկաբանության կլինիկական պրոֆեսոր Դարել Ռիգելը։

«Ակնհայտ է, որ ամռանը մենք ավելի շատ ենք ենթարկվում արեւի ազդեցությանը, բայց ամեն օր մենք պետք է հիշենք, որ ուլտրամանուշակագույն ճառագայթումը հայտնի քաղցկեղածին է»,- բացատրել է պրոֆեսոր եւ Ջորջ Վաշինգտոնի անվան բժշկական դպրոցի մաշկաբանության ամբիոնի վարիչ Ադամ Ֆրիդմանը։

Բժշկի խոսքով, կան երկու տեսակի արեւապաշտպան քսուքներ՝ որոնք օգտագործում եք ամեն օր եւ որոնք օգտագործում եք, երբ նախատեսում եք շատ ժամանակ անցկացնել դրսում։

Ամենօրյա օգտագործման համար Ֆրիդմանը խորհուրդ է տալիս ընտրել այնպիսի քսուքներ, որոնք կարող են օգտագործվել որպես խոնավեցնող կամ դիմահարդարման միջոցներ՝ SPF-ով, որպեսզի արեւից պաշտպանությունը դառնա ձեր առօրյայի մի մասը:

Արեւապաշտպան քսուքներն օգտակար միջոցներ են արեւային այրվածքներից եւ մաշկի քաղցկեղից պաշտպանվելու համար, բայց դրանք միակը չեն:

Հնարավորինս օգտակար է նաեւ գլխարկ կրելը, հագուստով ծածկվելը, արեւի ակտիվության գագաթնակետին դրսում մնալուց խուսափելը, խորհուրդ է տալիս փորձագետ Էմիլի Սփիլմանը։