նախընտրելի դարձնել
Հայաստանի հանրապետության ողջ տարածքում աղիքային հիվանդության համաճարակ չի արձանագրվել: Այս մասին NEWS.am Medicine-ին հայտնեցին ՀՀ ԱՆ մամուլի ծառայությունից։
Համաձայն հաղորդագրության, վերջին օրերին միակ աղիքային տեղային բռնկումը գրանցվել էր Քաջարանում, որն արդեն մարվել է:
Ավելի վաղ NEWS.am-ը հայտնել էր, որ աղիքային սինդրոմ ախտորոշմամբ վերջին 2-3 օրերին Կապանի բժշկական կենտրոն է ընդունվել 16 հոգի: Քաջարանից տեղափոխվել է 7 մեծահասակ եւ 6 երեխա, եւս 3 մեծահասակ էլ տեղափոխվել է Կապանից: Տեղափոխված անձանց մոտ առկա էր թուլություն, մրսածության, մարսողության խանգարում, թեթեւ փորլուծություն, ջերմություն:
Տեղեկատվության տարածումից հետո ԱՆ հաղորդել էր, որ նախարարության մասնագետների կողմից անմիջապես կազմակերպվել եւ իրականացվել են դեպքերի եւ օջախների համաճարակաբանական հետազոտություն, բակային համայցեր:
Քաջարանի ստացիոնար նմուշառման կետերից մանրէաբանական հետազոտության համար կատարվել է խմելու ջրի 12 նմուշառում եւ առաջնային ցանցում մնացորդային քլորի որոշում:
Հետազոտության պահին ջրի որակի շեղումներ չեն արձանագրվել, սակայն դեպքերի՝ քաղաքում տարածվածությունը, տարբեր տարիքային խմբերում եւ միաժամանակյա ի հայտ գալը, նախանշում են, որ հիվանդությունների առաջացման հավանական գործոն կարող են հանդիսանալ միամոմենտ աղտոտված խմելու ջուրը կամ սննդային գործոնը:
