Մասաչուսեթսի տեխնոլոգիական ինստիտուտի գիտնականները ներկայացրել են երկբաղադրիչ համակարգ, որը կարող է դադարեցնել վնասվածքի հետեւանքով առաջացած ներքին ուժեղ արյունահոսությունը։ Ամերիկացի գիտնականների հոդվածը հրապարակվել է Advanced Healthcare Materials-ում։

Հետազոտողների խոսքով՝  տեխնոլոգիան արհեստական թրոմբներ է առաջացնում վնասված տեղերում՝ նմանակելով օրգանիզմի բնական պաշտպանությունը։ Նրանք ստեղծել են համակարգ, որը թրոմբոցիտները եւ ֆիբրինոգենը՝ արյան մակարդման համար անհրաժեշտ հիմնական բաղադրիչները, փոխարինում է արհեստական ​​մարմիններով։

Տեխնոլոգիայի ստեղծողները օգտագործել են  կենսահամատեղելի պոլիմերից նանոմասնիկներ, որոնք համատեղելի են ակտիվացված թրոմբոցիտների հետ։ Այս մասնիկները ունեն 140-ից 220 նմ չափսեր եւ կուտակվում են վերքի հատվածներում՝ առանց առողջ օրգաններում թրոմբների առաջացման վտանգի, որտեղ այն կարող է մահացու լինել (օրինակ՝ թոքերում):

Որպես ուժեղ արյունահոսությունը դադարեցնելու տեխնոլոգիայի երկրորդ բաղադրիչ՝ գիտնականներն օգտագործել են պոլիէթիլենգլիկոլից պատրաստված այսպես կոչված «կարող գործակալներ», որոնք կարող են վնասված հատվածում գտնել անհրաժեշտ նանոմասնիկները՝ օգտագործելով հատուկ մարկերներ եւ ձեւավորել արհեստական ​​թրոմբներ։

Գիտնականները գյուտը փորձարկել են լաբորատոր մկների վրա։ Փորձերը ցույց են տվել, որ նրանց ստեղծած համակարգը արդյունավետորեն դադարեցրել է կրծողների վերքերի ներքին արյունահոսությունը՝ առանց ալերգիկ ռեակցիա առաջացնելու։ Գիտնականները նաեւ նշել են, որ արհեստական ​​թրոմբներն ավելի կայուն են եղել, քան բնականները, քանի որ դրանք չեն քայքայվել աղի լուծույթի ներարկման ժամանակ։