նախընտրելի դարձնել
Քաղցկեղի երեք տեսակների բուժման մասշտաբների կրճատումը կարող է հեշտացնել հիվանդների կյանքը՝ առանց արդյունքներին վնաս հասցնելու, քաղցկեղի դեմ պայքարի աշխարհի խոշորագույն համաժողովում հայտնել են բժիշկները, գրում է Associated Press-ը։
Գիտնականների վերջին հետազոտությունները վերաբերել են ձվարանի, կերակրափողի քաղցկեղներին և Հոջկինի լիմֆոմային:
Երեսուն տարի առաջ քաղցկեղի հետազոտություններն ուղղված էին նրան, որ ավելին արվեր, ոչ պակաս: Մի դեպքում բարձիթողի արված կրծքագեղձի քաղցկեղով հիվանդ կանայք մահվան եզրին են հասցվել քիմիոթերապիայի հսկայական չափաբաժինների և ոսկրածուծի փոխպատվաստումների պատճառով: Այս մոտեցումը քիմիաթերապիայից ոչնչով ավելի լավը չէր, և հիվանդները տուժում էին:
Այժմ, փորձելով օպտիմալացնել քաղցկեղի բուժումը, հետազոտողները հարցնում են. «Արդյո՞ք մեզ անհրաժեշտ են այն բոլոր բուժումները, որոնք մենք օգտագործում էինք նախկինում»:
Հաճախ դեղերի որակի բարելավման պատճառով բուժման արդյունավետությունը նվազում է։
Այս միտումը հետապնդող հետազոտություններն են քննարկվել անցյալ շաբաթավերջին Չիկագոյում Կլինիկական ուռուցքաբանության ամերիկյան ընկերության համաժողովում: Ահա հետազոտության հիմնական արդյունքները.
Ձվարանի քաղցկեղ
Ֆրանսիացի հետազոտողները պարզել են, որ ձվարանի քաղցկեղի վիրահատության ժամանակ առողջ թվացող ավշային հանգույցների հեռացումից խուսափելն անվտանգ է: Հետազոտությունը համեմատել է 379 հիվանդի արդյունքները, որոնցից կեսին հեռացրել են ավշային հանգույցները, իսկ կեսին՝ ոչ: Ինը տարի անց տարբերություն չի եղել հիվանդների կյանքի տևողության հարցում, և այն հիվանդները, որոնք ավելի նվազ բարդ վիրահատության են ենթարկվել, ավելի քիչ բարդություններ են ունեցել, ինչպիսին է արյան փոխներարկման անհրաժեշտությունը: Հետազոտությունը ֆինանսավորել է Ֆրանսիայի Քաղցկեղի ազգային ինստիտուտը:
Կերակրափողի քաղցկեղ
Գերմանական այս հետազոտությանը մասնակցել է վիրահատությամբ բուժվող կերակրափողի քաղցկեղով հիվանդ 438 մարդ: Նրանց կեսն անցել է ընդհանուր բուժման կուրս, որը ներառում էր քիմիաթերապիա և կերակրափողի վիրահատություն: Հիվանդների մյուս կեսին առաջարկվել է այլ մոտեցում, որը ներառում էր նաև ճառագայթում: Երկու մեթոդներն էլ համարվում են ստանդարտ: Ընտրությունը կախված է նրանից, թե որտեղ են նրանք բուժվում:
Երեք տարվա ընթացքում քիմիաթերապիայի և վիրահատության ենթարկվածների 57%-ը ողջ էր, մինչդեռ քիմիաթերապիա, վիրահատություն և ճառագայթում անցածների միայն 51%-ն էր ողջ: Հետազոտությունը ֆինանսավորել է Գերմանական հետազոտական հիմնադրամը։
Հոջկինի լիմֆոմա
Բարձիթողի մատնված Հոջկինի լիմֆոմայի դեպքում քիմիաթերապիայի երկու սխեմաների համեմատությունը ցույց է տվել, որ ավելի նվազ ինտենսիվ բուժումն ավելի արդյունավետ է արյան քաղցկեղի դեպքում և ունի ավելի քիչ կողմնակի ազդեցություններ:
Չորս տարի անց ավելի մեղմ քիմիաթերապիան հնարավորություն է տվել վերահսկել հիվանդությունը մարդկանց 94%-ի մոտ՝ համեմատած այն 91%-ի հետ, որոնք ավելի ինտենսիվ բուժում են ստացել: Հետազոտությանը մասնակցել է 1482 մարդ ինը երկրից՝ Գերմանիայից, Ավստրիայից, Շվեյցարիայից, Նիդեռլանդներից, Դանիայից, Շվեդիայից, Նորվեգիայից, Ավստրալիայից և Նոր Զելանդիայից։ Այն ֆինանսավորել է Takeda Oncology ընկերությունը, որը ավելի մեղմ քիմիաթերապիայի մեջ օգտագործվող դեղամիջոցներից մեկի արտադրողն է:
