նախընտրելի դարձնել
Հայաստանի առողջապահության նախարարությունը, հիմք ընդունելով Առողջապահության համաշխարհային կազմակերպության մոտեցումները եւ ուսումնասիրելով Էբոլա վիրուսով հարուցված հիվանդության դեմ պայքարի ԱՄՆ Հիվանդությունների վերահսկման կանխարգելման կենտրոնի կողմից առաջարկված մոտեցումները, հիվանդությունը կանխարգելելու նպատակով իրականացնում է հետեւյալ միջոցառումները`
- ՀՀ առողջապահության նախարարի հրամանով ամրագրվել են բոլոր հնարավոր կանխարգելիչ եւ հակահամաճարակային միջոցառումները։
- Ուժեղացվել է հսկողությունը պետական սահմանի ինչպես օդային, այնպես էլ ցամաքային անցակետերում։ Տեղադրվել են ջերմացուցիչներ, որոնք հնարավորություն են ընձեռում հեռավորության վրա հայտնաբերելու ջերմող հիվանդներին։
- Ձեռք են բերվել անհատական պաշտպանիչ արտահագուստների լրակազմ` անհրաժեշտության դեպքում կիրառելու համար։
- Բժշկական անձնակազմի իրազեկվածությունը բարձրացնելու նպատակով մշակվել է մեթոդական ուղեցույց։
- Մշակվել է հուշաթերթ ազգաբնակչության համար (կցվում է)։
- Ուղեւորներն իրազեկվում են ախտահարված երկրներ այցելության ժամանակ հնարավոր վտանգների մասին (հուշաթերթը կցվում է)։
- Ձերք են բերվել լաբորատոր կարողություններ, այն է` ախտորոշիչ համակարգեր։
- Իրականացվել են սեմինար դասընթացներ բուժանձնակազմի, տուրիստական կազմակերպություններ համար։
- Առաջարկվել է ՀՀ գյուղատնտեսության նախարարությանն արգելելու վայրի կենդանիների մուտքը հանրապետություն:
Աշխատանքները շարունակվում են, հայտնում են ՀՀ ԱՆ մամուլի ծառայությունից։
Առողջապահության նախարարությունը նաեւ տեղեկացնում է, որ Էբոլա վիրուսով հարուցված հիվանդությունը կամ Էբոլա հեմոռագիկ տենդը սուր ընթացքով վարակիչ հիվանդություն է:
Առաջին անգամ այս հիվանդությունն արձանագրվել է 1976 թվականին Էբոլ գետի հարակից բնակավայրում, որտեղից էլ ծագել է հիվանդության անունը: Հարուցիչը Էբոլա վիրուսն է:
Էբոլա վիրուսը մարդուն փոխանցվում է հիվանդ կենդանու կամ մարդու հետ անմիջական շփման արդյունքում (շփում արյան, ախտահարված օրգանների կամ շրջապատի առարկաների հետ): Հիվանդի վաղ հայտնաբերման դեպքում վերջինիս առողջանալու հնարավորությունը մեծանում է: Կա վիրուսի 5 ենթատեսակ, որոնք անջատվել են աֆրիկյան տարբեր բնակավայրերում:
Վիրուսի բնական պահոցը հատուկ տեսակի չղջիկներն են (այդպիսիք Հայաստանում չկան): Վիրուսը մարդկանց է փոխանցվում չղջիկների կամ հիվանդ վայրի որոշ կենդանիների (կապիկներ, խոզեր, մացառախոզեր, այծամներ) հետ սերտ արյունային կամ լորձային շփման (կծել, ճանկռել եւ այլն) կամ կենդանիների դիակների հետ շփման միջոցով:
Հիվանդությունը չի փոխանցվում օդակաթիլային ճանապարհով:
Գաղտնի շրջանը մի քանի ժամից (առավել հաճախ` 48 ժամից) մինչեւ 21 օր է:
Բուժումն իրականացվում է միայն հիվանդանոցում՝ մեկուսացման պայմաններում:
Էբոլա վիրուսով հարուցված հիվանդության հատուկ բուժումը բացակայում է:
Էբոլա վիրուսով հարուցված հիվանդության դեմ առկա չէ պատվաստանյութ:
Առողջապահության համաշխարհային կազմակերպության գնահատմամբ վերջին 9-10 ամսվա ընթացքում աֆրիկական մի շարք երկրներում (Գվինեա, Սիերա Լեոնե, Նիգերիա, Լիբերիա, վերջերս նաեւ` Սենեգալ եւ Կոնգոյի Դեմոկրատական Հանրապետություն) էբոլա վիրուսով հարուցված հիվանդության բռնկում կա։ Պետք է նշել, որ հիվանդությունը 2012 թվականի դեկտեմբերից հիմնախնդիր է հանրային առողջապահության մարմինների համար:
Առողջապահության համաշխարհային կազմակերպության տվյալներով մինչ օրս ամբողջ աշխարհում արձանագրվել է էբոլա վիրուսով հարուցված 9000-ից ավելի դեպք, որից 4000-ը` մահվան ելքով:
Բացի աֆրիկական երկրներից էբոլա վիրուսով հարուցված հիվանդության դեպքեր արձանագրվել են թե՛ եվրոպական, եւ թե՛ ամերիկյան տարածաշրջանի երկրներում, մասնավորապես`
Իսպանիայում արձանագրվել է էբոլա վիրուսով հարուցված հիվանդության 2 դեպք: Վերջիններս եղել են վանականեր, ովքեր աֆրիկական երկրներում օգնել են էբոլա վիրուսով հարուցված հիվանդների: Այնուհետեւ հոսպիտալացվել է 1 հիվանդ (բուժքույր, ով շփում է ունեցել հիվանդ վանականի հետ) եւ 2 կասկածելի հիվանդ (1 բուժքույր եւ նրա ամուսինը):
Կասկածելի դեպքեր են արձանագրվել նաեւ Միացյալ Թագավորությունում եւ Չեխիայում:
2014 թվականի սեպտեմբերի 29-ին ԱՄՆ Տեխասի նահանգում արձանագրվել էր մեկ հիվանդ (Թոմաս Դունկան, ով Լիբերիայից գնացել է Տեխասի նահանգ` հարազատների մոտ): Հոկտեմբերի 9-ին հիվանդը մահացել է: 80 կոնտակտավոր մեկուսացված են: ԱՄՆ Հիվանդությունների վերահսկման եւ կանխարգելման կենտրոնի պաշտոնական հայտարարությամբ (13.10.2014թ.) Տեխասի նահանգի Դալլասի հիվանդանոցում հիվանդությունը հաստատվել է մեկ բուժքրոջ մոտ, ով շփում է ունեցել մահացած այդ հիվանդի հետ:
Կասկածելի դեպք է արձանագրվել նաեւ Բրազիլիայում (հետազոտության ընթացքում է):
Առողջապահության համաշխարհային կազմակերպությունը առաջարկում է`
- Բարձր պատրաստականության բերել առողջապահական կազմակերպությունները հիվանդների վաղաժամ հայտնաբերման, ախտորոշման, մեկուսացման եւ բուժման համար:
- Միջազգային նշանակության օդանավակայաններում ձեւավորել կարողություններ տենդով ուղեւորների հայտնաբերման եւ մեկուսացման համար:
- Իրազեկել ուղեւորներին ախտահարված երկրներ այցելության ժամանակ հնարավոր վտանգների մասին:
