Չինացի բժիշկների թիմը կրծքագեղձի քաղցկեղի հետազոտության համար արհեստական ​​ բանականության վրա հիմնված ինֆրակարմիր ջերմագրության (AI-IRT) համակարգ է մշակում, որն օգտատերերին հնարավորություն է տալիս հավելվածի միջոցով հեշտությամբ ստուգել քաղցկեղի ռիսկի մակարդակը՝ պարզապես իրենց սմարթֆոններին միացնելով ինֆրակարմիր տեսախցիկները, գրում է Xinhua-ն:

Ըստ հետազոտական ​​թիմի հիմնական անդամներից մեկի՝ Պեկինի «Սեհե» հիվանդանոցի կրծքագեղձի վիրաբուժության բաժանմունքի գլխավոր բժիշկ Սուն Ծիանգի՝  համակարգը բաղկացած է ինֆրակարմիր տեսախցիկից, արհեստական ​​բանականության ալգորիթմից և տվյալների մշակման մեծ հարթակից:

Միացնելով ինֆրակարմիր տեսախցիկներն իրենց սմարթֆոններին՝ օգտատերերը կարող են դրանք օգտագործել՝ իրենց կրծքի ջերմային պատկերները նկարելու համար: Ստացված պատկերները վերբեռնվում են բջջային հավելվածում, ավտոմատ կերպով մշակվում արհեստական ​​բանականության ալգորիթմի միջոցով և այնուհետև ներկայացվում որպես քաղցկեղի տարբեր մակարդակներ ցուցադրող տվյալներ:

Հետազոտական ​​թիմն ակնկալում է, որ համակարգը ավելի հարմար, ճշգրիտ և ծախսարդյունավետ լուծում կտա չինացի կանանց շրջանում կրծքագեղձի քաղցկեղի նախակլինիկական զննման համար: Ներկայում կրծքագեղձի ինքնազննումը նախակլինիկական զննման հիմքն է, սակայն կանանց մեծամասնությունը կանոնավոր կերպով չի կատարում այս պրոցեդուրան կամ այն ​​սխալ է անում:

Կրծքագեղձի քաղցկեղը Չինաստանում կանանց առողջության հիմնական խնդիրներից մեկն է: 2022 թվականին Չինաստանը հայտնել է կրծքագեղձի քաղցկեղի 357 հազար 200 նոր դեպքի մասին, որը երկրորդն է չարորակ ուռուցքով տառապող կանանց շրջանում տարածված հիվանդությունից այդ տարի և դարձել է 75 հազար կանանց մահվան պատճառ:

«Վաղ զննումն ու ախտորոշումը այս հիվանդության բուժման բանալին են»,-ընդգծել է Սուն Ծիանգը:

Հիմնական կլինիկական սքրինինգի եղանակների համեմատ, ինչպիսին են ուլտրաձայնային հետազոտությունը, մամոգրաֆիան և մագնիսա-ռեզոնանսային շերտագրումը (MRI), AI-IRT համակարգը որպես լայնածավալ նախակլինիկական սքրինինգի եղանակ ոչ ինվազիվության, ճառագայթման, արագության և հասանելիության առավելություններ ունի: IRT-ն միաժամանակ արդյունավետ եղանակ է համարվում կոշտ կրծքի հայտնաբերման համար, որոնք առավել հաճախ հանդիպում են ասիացի կանանց շրջանում։

«Սա չինական լուծում է չինացի կանանց կրծքագեղձի քաղցկեղի նախակլինիկական սքրինինգի համար»,-ասում է Պեկին Սիեհե հիվանդանոցի Կրծքագեղձի վիրաբուժության բաժանմունքի վարիչ Չժոու Իդունգը:

Հիմնվելով իրենց ընթացիկ արդյունքների վրա՝ հետազոտողները հույս ունեն ապագայում AI-IRT համակարգը ներկայացնել լայն հանրությանը՝ տներում և համայնքային առողջապահական կենտրոններում օգտագործելու համար՝ վերացնելով հիվանդանոցներում նախօրոք նշանակումներ կատարելու և կլինիկական հետազոտություններին օրերով սպասելու անհրաժեշտությունը:

Վերոնշյալ բաժանմունքի բժիշկներից մեկը՝ Վանգ Սյուեֆեյը, որը միաժամանակ հետազոտական ​​թիմի հիմնական անդամներից է, նշում է, որ թեև հետազոտության արդյունքները հետագա հաստատման համար պահանջում են ավելի բարձրորակ հեռանկարային հետազոտություններ, կասկած չկա, որ AI-IRT համակարգն կիրառման հսկայական պոտենցիալ արժեք ունի: