նախընտրելի դարձնել
Նոր հետազոտությունը ցույց է տվել, որ ճարպակալումից տառապող մարդկանց օրգանների շուրջ ճարպի կուտակումը սերտորեն կապված է ուղեղում Ալցհայմերի հիվանդությանն առնչվող սպիտակուցների կուտակման հետ, հաղորդում է Health Day-ը։
Վիսցերալ ճարպը մարդու մարմնի բնական ճարպային հյուսվածք է, որը կուտակվում է որովայնի հատվածում՝ ներսից: Այն ցնցումների բնական փոխհատուցող է, պաշտպանում է կենսական օրգանները՝ դրանք ցանկալի դիրքում պահպանելով ։
Միջին տարիքում այս օրգանական ճարպի կուտակումը կարող է մեծացնել ուղեղին վնասող երկու սպիտակուցների՝ ամիլոիդ և տաու պրոտեինների մակարդակը, պարզաբանում է Սենտ Լուիսում Վաշինգտոնի համալսարանին առընթեր բժշկության դպրոցի Մահսա Դոլաթշահիի ղեկավարած խումբը:
Ալցհայմերի հիվանդության իրական ախտանիշները կարող են ի հայտ գալ միայն շատ տարիներ անց:
Դոլաթշահին համալսարանին առընթեր Մալինկրոդտի ռադիոլոգիայի ինստիտուտի գիտաշխատող է:
Նրա աշխատանքի արդյունքները երկուշաբթի ներկայացվել են Չիկագոյում Հյուսիսային Ամերիկայի ռադիոլոգիական ընկերության (RSNA) տարեկան ժողովում:
Դոլաթշահիի թիմին հետաքրքրել է՝ արդյոք միջին տարիքում կարո՞ղ են լինել Ալցհայմերի հիվանդության հետագա զարգացման հավանականության վրա ազդող գործոններ:
«Մեր ուսումնասիրությունը ցույց տվեց, որ ներքին օրգանների ճարպի ավելացումը առնչվում է է Ալցհայմերի հիվանդությանը բնորոշ երկու անոմալ սպիտակուցների՝ ամիլոիդի և տաուի PET սկանավորման մակարդակի բարձրացման հետ»,-ասում է Դոլաթշահին: «Որքան մեզ հայտնի է՝ մեր հետազոտությունը միակն է, որը ցույց է տալիս այս արդյունքները միջին տարիքում, երբ մեր մասնակիցները տասնամյակներ անց զարգացնում են Ալցհայմերի հիվանդության հետևանքով առաջացած դեմենցիայի ամենավաղ ախտանիշները»:
Ըստ Ալցհայմերի դեմ պայքարի ասոցիացիայի տվյալների, ներկայում Ալցհայմերի հիվանդությամբ տառապում են 65 տարեկան և ավելի բարձր տարիքի 6,9 միլիոն ամերիկացիներ, և այդ թիվը մինչև հարյուրամյակի կեսը կարող է հասնել 13 միլիոնի:
