նախընտրելի դարձնել
«Էրեբունի» ռադիոթերապիայի կենտրոնում, հեռակառահար ճառագայթային թերապիայից զատ, իրականացվում է նաև կոնտակտային ճառագայթային թերապիա կամ բրախիթերապիա: Թերապիան իրագործվում է Varian ընկերության հատուկ Bravos սարքի միջոցով՝ իրիդիումի ռադիոակտիվ իզոտոպի կիրառմամբ։ Այս ժամանակակից սարքավորումը հնարավորություն է ընձեռում ճշգրիտ հաշվարկել ճառագայթման չափաբաժինը և նվազեցնել կողմնակի ազդեցությունները։
Կենտրոնի ճառագայթային ուռուցքաբան Նատալյա Կորնիևսկայան NEWS.am Medicine-ին պարզաբանում է՝ ինչ է բրախիթերապիան և ինչպես է այն իրագործվում։
Ի՞նչ է բրախիթերապիան
Բրախիթերապիան ճառագայթային թերապիայի բարձր ճշգրտության կոնտակտային եղանակ է, երբ իոնացնող ճառագայթման աղբյուրը կիրառվում է ուղղակիորեն ուռուցքային հյուսվածքի վրա կամ տեղակայվում է ուռուցքին մոտ՝ ոչնչացնելով այն ներսից:
Դրա հիմնական առավելությունը ճառագայթման առավելագույն չափաբաժիններն ուղղակիորեն ուռուցքին հասցնելու հնարավորությունն է՝ շրջակա առողջ օրգանների և հյուսվածքների վրա նվազագույն ազդեցությամբ, ինչպես նաև՝ կարճ ժամանակում ճառագայթում հաղորդելու կարողությունը:
Ո՞ր հիվանդությունների դեպքում է կիրառվում բրախիթերապիան
Բրախիթերապիան գինեկոլոգիական քաղցկեղ ունեցող պացիենտների բուժման ոսկե ստանդարտն է և լայնորեն կիրառվում է արգանդի վզիկի, արգանդի, հեշտոցի և ամոթույքի քաղցկեղի դեպքում:
«Բրախիթերապիան լավագույն թերապևտիկ տարբերակն է պերիորբիտալ հատվածում, քթի և ականջների մաշկին տեղակայված ոչ մելանոմային չարորակ նորագոյացություններով հիվանդների բուժման համար, քանի որ վիրաբուժական միջամտությունը միշտ չէ, որ հանգեցնում է բավարար կոսմետիկ և ֆունկցիոնալ արդյունքների: Նույնը վերաբերում է կոպերի չարորակ նորագոյացություններին, վերին և ստորին շուրթերի կարմիր եզրագծի քաղցկեղին։ Այս իրավիճակներում ընտրության մեթոդը բրախիթերապիան է»,- ասում է բժիշկը։
Բացի դրանից, բրախիթերապիան լայնորեն կիրառվում է շագանակագեղձի, կերակրափողի, բրոնխների, հետանցքի և կրծքագեղձի քաղցկեղի բուժման մեջ։
Բրախիթերապիայի տեսակները
Ըստ ռադիոնուկլիդային աղբյուրի առաքման եղանակի՝ բրախիթերապիան բաժանվում է 2 խմբի.
- ներհյուսվածքային (երբ աղբյուրը ներմուծվում է ուռուցքային հյուսվածքի մեջ)
- կոնտակտային (երբ ռադիոակտիվ աղբյուրն ուռուցքին մոտ է):
Կոնտակտային բրախիթերապիան իր հերթին բաժանվում է.
- ներխոռաչայինի (ավելի հաճախ գինեկոլոգիական քաղցկեղի դեպքում),
- ներկուսանցքայինի (կերակրափողի և բրոնխների քաղցկեղի դեպքում)
- մաշկի մակերեսային (ապպլիկացիոն) բրախիթերապիայի (մաշկի քաղցկեղի դեպքում)
Բրախիթերապիան իրականացվում է ինչպես ինքնուրույն, այնպես էլ հեռահար ճառագայթային թերապիային զուգահեռ։ Առանձին ռեժիմում բրախիթերապիան կիրառելի է մաշկի քաղցկեղի 1-ին և 2-րդ փուլերի դեպքում. ցածր ռիսկի պացիենտների շագանակագեղձի քաղցկեղի համար և որպես ռադիկալ վիրահատությունից հետո ճառագայթման հետվիրահատական ընթացք: Գինեկոլոգիական ուռուցքաբանության մեջ բրախիթերապիան հիմնականում զուգակցվում է հեռահար ճառագայթային թերապիայի հետ։
«Բրախիթերապիան, որպես կանոն, չի զուգակցվում պոլիքիմիաթերապիայի կուրսերի հետ, քանի որ նման բուժումը բավականին թունավոր է։ Հաշվի առնելով այն կարճ ժամանակահատվածը, որի ընթացքում իրականացվում է բրախիթերապիան, այն կարող է իրականացվել պոլիքիմիաթերապիայի կուրսերի ընդմիջումների ընթացքում»,- բացատրում է Կորնիևսկայան։
Ինչպե՞ս է կատարվում բրախիթերապիան
Բժիշկը հատուկ ապլիկատորներ կամ ինտրաստատներ է տեղադրում ուռուցքից տուժած օրգանի կամ հյուսվածքի մեջ, որի մեջ էլեկտրամեխանիկորեն մատակարարվում է իրիդիումի ռադիոակտիվ իզոտոպը: Ռադիոիզոտոպը արձակում է գամմա ճառագայթում, որը վնասում է ուռուցքային բջիջների ԴՆԹ-ն՝ կանխելով դրանց տրոհումն ու աճը։
Ճառագայթման սեանսից հետո ռադիոակտիվ աղբյուրը վերադարձվում է պահեստարան, բժիշկը հեռացնում է ապլիկատորը, և պացիենտը նույն օրը կամ հաջորդ օրը ինքնուրույն լքում է կլինիկան:
«Պացիենտի ներսում ճառագայթող տարրեր չկան, նա ուրիշների համար վտանգավոր չէ»,- նշում է բժիշկը։
Բուժման տևողությունը
Իրիդիումի ռադիոակտիվ իզոտոպը բարձր ակտիվության աղբյուր է։ Նման աղբյուրի օգտագործումը ժամանակակից բրախիթերապիայի սարքերում հնարավորություն է ընձեռում բուժումն իրականացնել կարճ ժամանակահատվածում։
Օրինակ, 1-2 փուլի մաշկի քաղցկեղը կարող է բուժվել բրախիթերապիայի միջոցով 7-8 սեանսների ընթացքում, ինչը կլինիկայում 1,5 շաբաթ տևող ամենօրյա ամբուլատոր բուժում է:
Շագանակագեղձի քաղցկեղը ցածր ռիսկային պացիենտների մոտ կարող է բուժվել բրախիթերապիայի 2 սեանսով:
Բրախիթերապիայի նախապատրաստում
Բրախիթերապիայի նախապատրաստումը կախված է ուռուցքի տեղայնացումից:
Օրինակ, մաշկի քաղցկեղը հատուկ նախապատրաստություն կամ ցավազրկում չի պահանջում: Մաշկի ներհյուսվածքային բրախիթերապիայի ժամանակ, երբ ճկուն պլաստիկ ինտրաստատները տեղակայվում են մաշկի ուռուցքի մեջ, ինֆիլտրացիոն անզգայացումն իրականացվում է լիդոկաինի լուծույթով կամ այլ անզգայացնող միջոցով:
Արգանդի վզիկի և արգանդի քաղցկեղի բրախիթերապիան իրականացվում է ներերակային կամ ողնուղեղային անզգայացման պայմաններում:
Շագանակագեղձի քաղցկեղի բրախիթերապիան իրականացվում է միայն ողնուղեղային անզգայացման պայմաններում:
«Էրեբունի» ռադիոթերապիայի կենտրոնում բրախիթերապիայի նախապատրաստման, ցավազրկման, ճառագայթումից հետո հնարավոր ճառագայթային ռեակցիաների բոլոր հարցերը բժիշկը հիվանդի հետ քննարկում է նախնական խորհրդատվության փուլում։
Արդյունավետությունը
Բրախիթերապիան հնարավորություն է ընձեռում ուռուցքի ճառագայթման չափաբաժինը հասցնել ուռուցքային բջիջների համար մահացու չափաբաժնի:
Բրախիթերապիայի հակացուցումները
Բրախիթերապիայի հակացուցումներն են
- ուռուցքային ախտահարման մեծ ծավալ
- բազմակի մետաստազներ
- տարաբնույթ վիրախորշեր
- ուղեկցող հիվանդություններ դեկոմպենսացիայի փուլում
Ինչպես պարզաբանում է Նատալյա Կորնիևսկայան, ներկայում ուռուցքի մեջ ապլիկատորի կամ ինտրաստատների տեղակայումը վերահսկելու համար կիրառվում են համակարգչային տոմոգրաֆիա (CT) կամ մագնիսառեզոնանսային շերտագրություն (MRI) և բժշկական ֆիզիկոսի հետ համատեղ իրականացվում է ուռուցքի ծավալում չափաբաժնի բաշխման եռաչափ դոզիմետրիկ պլանավորում:
Սա հնարավորություն է ընձեռում բարելավել տեղային ուռուցքային հսկողությունը և, հետևաբար, բարելավել պացիենտի ապրելիությունը:
Այսպիսով, բարձրորակ բրախիթերապիայի համար անհրաժեշտ է.
- ժամանակակից սարք
- ռադիոակտիվ աղբյուր, որը պետք է փոխարինվի 3-4 ամիսը մեկ
- թանկարժեք ապլիկատորների մեծ գրադարան
- պատկերման գործիքներ՝ CT կամ MRI
- բարձր որակավորում ունեցող մասնագետների թիմ
