Մեծ Բրիտանիայում սրտի անբավարարություն ունեցող մարդկանց բուժման սկզբում դեղամիջոցների մեծ չափաբաժիններ են նշանակում այն բանից հետո, երբ գլոբալ ուսումնասիրությունը ցույց է տվել, որ դա հանգեցնում է մահացությունների զգալի կրճատման, գրել է The Guardian-ը:

Փորձագետները նշել են, որ նոր մոտեցումը կարող է նշանակել, որ պոտենցիալ մահացու հիվանդություններ ունեցող պացիենտները կսկսեն դեղերի օպտիմալ քանակություն ստանալ ախտորոշումից հետո երկու շաբաթվա ընթացքում, այլ ոչ թե շատ ամիսներ անց:

Այլ երկրների տվյալները, որոնք արդեն օգտագործել են այս բուժումը, ցույց են տվել, որ այն 62 տոկոսով նվազեցրել է սրտի անբավարարությունից մահացությունը եւ 30 տոկոսով կրճատել կրկին հիվանդանոց ընկնելու ռիսկը։ Սրանք են եղել Strong-HF հետազոտության հիմնական արդյունքները, որին մասնակցել են 14 երկրների 87 հիվանդանոցներ:

Մեծ Բրիտանիայում մոտ 1 միլիոն մարդ տառապում է սրտի անբավարարությունից, որը բուժում չունի: Սա նշանակում է, որ սիրտն այլեւս չի կարող արդյունավետ կերպով արյուն մղել ամբողջ մարմնին, ինչի հետեւանքով մարդիկ շնչահեղձ են լինում ու հոգնած են:

Լոնդոնի Սուրբ Գեորգի եւ Սուոնսիի Մորիստոն հիվանդանոցները սկսել են պացիենտներին բուժել նորարարական բուժումով, որն, ըստ նրանց, «արմատապես փոխում է իրավիճակը»: Կլինիկական անձնակազմը համեմատել է մոտեցումը, որը հայտնի է որպես «արագ տիտրավորում», այն բանի հետ, թե ինչպես են քաղցկեղով պացիենտներին նշանակվում քիմիաթերապիայի դեղերի ամբողջական չափաբաժին բուժման սկզբից՝ բարելավելու համար նրանց վերականգնման հնարավորությունները:

«Գլոբալ հետազոտությունը ցույց է տվել, որ երբ մենք սկսում ենք պացիենտներին տալ այս դեղերը, մենք 62 տոկոսով նվազեցնում ենք նրանց մահվան հավանականությունը, իսկ սրտի անբավարարության պատճառով կրկնակի հոսպիտալացման հավանականությունը՝ 30 տոկոսով։ Սա հսկայական գումար է եւ նշանակում է, որ մենք կարող ենք կանխել հնարավոր մահերը՝ միաժամանակ նվազեցնելով հիվանդանոցների բեռը»,- նշել են փորձագետները։