Ուգանդան շաբաթ օրը հայտարարել է Էբոլա վիրուսի բռնկման ավարտի մասին, որը հունվարի վերջից արևելաաֆրիկյան այս երկրում խլել է առնվազն երկու մարդու կյանք, հաղորդում է AFP-ն։

Հայտարարությունը հրապարակվել է վերջին հաստատված հիվանդի հիվանդանոցից դուրս գրվելուց 42 օր անց։ Բռնկումը դարձավ մահաբեր վիրուսով Ուգանդայի վարակման վեցերորդ դեպքը, որն ունի վեց տարբեր շտամ, որոնցից երեքը խոշոր համաճարակների պատճառ են դարձել։

«Այս բռնկման ընթացքում գրանցվել է 14 դեպք, որոնցից 12-ը հաստատվել, իսկ երկուսը՝ չեն հաստատվել լաբորատոր հետազոտություններով: Գրանցվել է չորս մահվան դեպք՝ երկուսը հաստատված և երկուսը հավանական: Տասը մարդ ապաքինվել է վարակից», - ասվում է Առողջապահության համաշխարհային կազմակերպության հայտարարության մեջ:

Սուդանում Էբոլա վիրուսով վարակման հաստատված դեպքերի հետևանքով մահացել են չորս տարեկան երեխա և բուժքույր։ Աֆրիկյան միության առողջապահական գործակալության (Africa CDC) տվյալներով, հիվանդի հետ շփում ունեցած մի քանի տասնյակ մարդիկ նույնպես հսկողության տակ են վերցվել։

«Էբոլա վիրուսային հիվանդության սուդանյան շտամի ներկայիս բռնկումը պաշտոնապես ավարտվել է, - երկուշաբթի օրը հայտարարել է Ուգանդայի առողջապահության նախարարությունը։- Սա տեղի է ունենում 2025 թվականի մարտի 14-ին վերջին հաստատված հիվանդի դուրս գրվելուց 42 օր անց, երբ նոր դեպքեր չեն հայտնաբերվել»։

Ներկայումս Էբոլայի սուդանյան շտամի դեմ հաստատված պատվաստանյութ չկա։ Սակայն փետրվարին երկիրը սկսեց փորձարկել այս շտամի դեմ պատվաստանյութը։ Առողջապահության համաշխարհային կազմակերպությունը բարձր է գնահատել այն որպես Էբոլայի դեմ պատվաստանյութի ամենաարագ տարածումը համաճարակի ընթացքում։ Սակայն առողջապահության ոլորտում նման ջանքերի ֆինանսավորման համար միջազգային պայմանները լուրջ խնդիրներ են հարուցում։

Էբոլան մարդուց մարդու է փոխանցվում կենսահեղուկների միջոցով։ Վարակված մարդիկ վարակիչ չեն դառնում մինչև ախտանիշների՝ հիմնականում ջերմության, փսխման, արյունահոսության և լուծի ի հայտ գալը, որոնք նկատվում են երկուսից 21 օր տևող ինկուբացիոն շրջանից հետո։ Վերջին կես դարի ընթացքում Էբոլայի բոլոր վեց շտամներից միասին վերցրած Աֆրիկայում ավելի քան 15․000 մարդ է մահացել։