ՄԱԿ-ի առողջապահության գործակալությունը՝ Առողջապահության համաշխարհային կազմակերպությունը (ԱՀԿ), երեքշաբթի ընդունել է ապագա համավարակային ճգնաժամերի հաղթահարման վերաբերյալ դարակազմիկ համաձայնագիր՝ COVID-19 ճգնաժամով պայմանավորված ավելի քան երեք տարվա բանակցություններից հետո, հաղորդում է Ֆրանսպրեսը։

Համաձայնագրի նպատակն է COVID-19 համավարակին ուղեկցող անհամաձայնեցված արձագանքից և միջազգային քաոսից խուսափելը՝ բարելավելով գլոբալ համակարգումն ու հսկողությունը, ինչպես նաև պատվաստանյութերի հասանելիությունը ապագա համավարակների դեպքում։

Առողջապահության համաշխարհային կազմակերպության ամենամյա որոշումների ընդունման ասամբլեան ծրագիրն ընդունել է երեքշաբթի՝ Ժնևի կենտրոնակայանում։

Համաձայնագրի տեքստը վերջապես կոնսենսուսով համաձայնեցվեց անցյալ ամիս՝ մի շարք լարված բանակցություններից հետո։ Միացյալ Նահանգները դուրս եկավ այդ բանակցություններից՝ ԱՄՆ նախագահ Դոնալդ Թրամփի՝ ԱՀԿ-ից իր երկիրը դուրս բերելու որոշումից հետո. գործընթացը տևեց մեկ տարի։

«Աշխարհն այսօր ավելի անվտանգ դարձավ մեր անդամ պետությունների առաջնորդության, համագործակցության և համավարակի դեմ պայքարելու համար ԱՀԿ-ի պատմական համաձայնագիրը ընդունելու հանձնառության շնորհիվ»,- հայտարարության մեջ ասել է ԱՀԿ գլխավոր տնօրեն Թեդրոս Ադհանոմ Գեբրեյեսուսը,- Համաձայնագիրը հաղթանակ է հանրային առողջապահության, գիտության և բազմակողմ գործողությունների համար։ Սա մեզ հնարավորություն կտա համատեղ ավելի լավ պաշտպանելու աշխարհը ապագա համավարակի սպառնալիքներից։ Սա նաև վկայությունն է, որ միջազգային հանրությունն ընդունում է մեր քաղաքացիների, հասարակությունների և տնտեսությունների՝ COVID-19-ի նման համավարակների հանդեպ խոցելի չլինելու և կորուստների չենթարկվելու կարևորությունը։

Համաձայնագիրը նպատակ ունի համավարակներն ավելի արդյունավետորեն հայտնաբերելու և դրանց դեմ պայքարելու՝ ամրապնդելով միջազգային համակարգումն ու վերահսկողությունը, ինչպես նաև՝ ապահովելով պատվաստանյութերի և բուժման մեթոդների ավելի արդարացի հասանելիություն։

Բանակցությունները լարված են եղել հարուստ և զարգացող երկրների միջև տարաձայնությունների համատեքստում, քանի որ վերջիններս COVID-19 համավարակի ժամանակ զրկված են եղել պատվաստանյութերից։

Համաձայնագրին դիմադրել են նաև նրանք, ովքեր կարծում էին, որ այն կխախտի պետական ​​ինքնիշխանությունը։

Երկրները մինչև 2026 թվականի մայիս ժամանակ ունեն բանակցելու համաձայնագրով նախատեսված պաթոգենների հասանելիության և օգուտների բաշխման մեխանիզմի մանրամասների վերաբերյալ։

PABS մեխանիզմը նախատեսում է համավարակի ներուժ ունեցող հարուցիչներին հասանելիության, ինչպես նաև՝ դրանցից ստացված օգուտների՝ պատվաստանյութերի, թեստերի և բուժումների համատեղ օգտագործում։

PABS համակարգի վերջնական մշակումից հետո համաձայնագիրը հնարավոր կլինի վավերացնել։ Պայմանագիրն ուժի մեջ մտնելու համար անհրաժեշտ է 60 վավերացում։