նախընտրելի դարձնել
Կոնգոյի Դեմոկրատական Հանրապետությունում Էբոլայի վիրուսի նոր բռնկման հետևանքով մահացել է առնվազն 15 մարդ, հաղորդում է BBC News-ը՝ վկայակոչելով երկրի Առողջապահության նախարարությանը։
Նախարարությունում հավելել են, որ վիրուսը հաստատվել է 34-ամյա հղի կնոջ մոտ, որը հոսպիտալացվել էր անցյալ ամիս՝ բարձր ջերմություն և կրկնվող փսխում ախտանիշներ զարգացնելուց հետո։
Նա մահացել է ժամեր անց՝ Բազմաօրգանային դիսֆունկցիայի համախտանիշից։ Դա մահացու վիրուսի 16-րդ բռնկումն է լինելու վատ առողջապահական ծառայություններ մատուցող հսկայական կենտրոնական Աֆրիկայի պետությունում, որը տուժել է արևելքում տիրող հակամարտությունից։
Նախարարության տվյալներով՝ վերջին բռնկումը տեղի է ունեցել Կասաի կենտրոնական նահանգում, որտեղ գրանցվել է 28 կասկածելի դեպք։ Պաշտոնյաները կոչ են արել խստորեն պահպանել կանխարգելիչ միջոցառումները, դրանց թվում՝ հաճախակի ձեռքերի լվացումը և սոցիալական հեռավորությունը՝ բարձր ռիսկի գոտիներում։
Պաշտոնյաները հայտնել են, որ թեստերը հայտնաբերել են Էբոլայի վիրուսի զաիրյան շտամը, որը հազվագյուտ, բայց հաճախ մահացու հիվանդություն է։ Մահացած 15 մարդկանց թվում են եղել առողջապահական համակարգի չորս աշխատակիցներ։
«Դեպքերի թիվը, ամենայն հավանականությամբ, կաճի, քանի որ վարակի տարածումը շարունակվում է: Արձագանքման խմբերը և տեղական թիմերը կաշխատեն գտնելու այն մարդկանց, որոնք կարող են վարակված լինել և բժշկական օգնության կարիք ունեն՝ ապահովելու համար, որ բոլորը հնարավորինս արագ պաշտպանված լինեն», - ասվում է ԱՀԿ-ի հայտարարության մեջ:
Կոնգոյի Դեմոկրատական Հանրապետությունն ունի «դեղամիջոցների պաշար», ներառյալ՝ Էրվեբո պատվաստանյութի 2000 չափաբաժին, որն «արդյունավետ է այս տեսակի Էբոլայի վիրուսից պաշտպանվելու համար»,- հայտարարել է ԱՀԿ-ն:
Կոնգոյի Դեմոկրատական Հանրապետությունում Էբոլայի վիրուսի վերջին բռնկումը տեղի է ունեցել երեք տարի առաջ և խլել է վեց մարդու կյանք: 2018-2020 թվականների բռնկումը շատ ավելի մահացու էր, երբ ավելի քան 2000 մարդու կյանք էր խլել:
Վիրուսը, որը ենթադրաբար ծագել է մրգատու չղջիկներից, առաջին անգամ հայտնաբերվել է 1976 թվականին Էբոլա գետի մոտ, այն վայրում, որն այժմ Կոնգոյի Դեմոկրատական Հանրապետությունն է: Մարդիկ վարակվում են վնասված մաշկի կամ բերանի և քթի միջոցով՝ Էբոլայով հիվանդի արյան, փսխման, կղանքի կամ մարմնի հեղուկների հետ անմիջական շփման արդյունքում:
