Ո՞ր երկրներն են ամենաշատը ծախսում քաղցկեղի հետազոտությունների վրա

Ութ տարվա հետազոտության ընթացքում Միացյալ Նահանգները եղել է ամենաշատ ծախսողը, սակայն եվրոպական երկրները ևս միլիարդավոր եվրո են ներդրել։

The Lancet Oncology բժշկագիտական  հանդեսում հրապարակված նոր վերլուծությունը ցույց է տալիս, որ Եվրամիությունը քաղցկեղի հետազոտությունների համար տրամադրում է նախատեսված համաշխարհային պետական և բարեգործական ֆինանսավորման մեկ վեցերորդ մասը։

Այն ներառում է 2016-2023 թվականներին ամբողջ աշխարհում տրամադրված քաղցկեղի հետազոտությունների մոտ 108 հազար դրամաշնորհներ, որոնց ընդհանուր արժեքը կազմում է 51,4 միլիարդ ԱՄՆ դոլար (44 միլիարդ եվրո), հաղորդում է Euronews-ը: Ուսումնասիրությունը ներառել է պետական և բարեգործական ծախսերը, բայց ոչ մասնավոր հատվածի տվյալները։

Միացյալ Նահանգները կազմում են այդ ծախսերի 57%-ը (25,2 միլիարդ եվրո), ԵՄ-ն և դրա անդամ պետությունները՝ 16,8%-ը (7,4 միլիարդ եվրո), իսկ Միացյալ Թագավորությունը՝ 11,1%-ը (4,9 միլիարդ եվրո)։

Այլ խոշոր ներդրողներից են Ճապոնիան (3,6% կամ 1,6 միլիարդ եվրո), Ավստրալիան (2,9% կամ 1,3 միլիարդ եվրո), Կանադան և Չինաստանը (2,6% կամ 1,3 միլիարդ եվրո յուրաքանչյուրը): Համաշխարհային մասշտաբով ներդրումները նվազել են ամեն տարի, բացառությամբ 2021 թվականի, երբ կտրուկ աճ է գրանցվել: Հետազոտությունը ցույց է տվել, որ հետազոտությունների մակարդակն այդ ժամանակվանից ի վեր նվազել է՝ բացառությամբ ԵՄ-ի, որտեղ ներդրումները շարունակում են աճել:

Գերմանիան, որն ուսումնասիրված ժամանակահատվածում ծախսել է 610 միլիոն եվրո, ստացել է ԵՄ ներդրումների աճի մեծ մասը 2021 թվականից ի վեր:

Ընդհանուր առմամբ, համաշխարհային հետազոտությունների ֆինանսավորման մեծ մասը ստացվել է հարուստ երկրներից, որոնք իրենց միջոցների մեծ մասը ծախսել են ներքին նպատակներով: Ցածր եկամուտ ունեցող երկրների մասնաբաժինն ութ տարվա ուսումնասիրության ժամանակահատվածում կազմել է ընդամենը 48,4 միլիոն եվրո: