Վիրահատությունից կամ ճառագայթային թերապիայից հետո շագանակագեղձի քաղցկեղի ռեցիդիվ ունեցող տղամարդիկ կարող են օգուտ քաղել նոր համակցված թերապիայից, որը կլինիկական փորձարկումներում ցույց է տվել մահվան ռիսկի ավելի քան 40%-ով նվազեցում։
Համակցված թերապիան ներառում է էնզալուտամիդ դեղամիջոցը, որն ավելացվում է ստանդարտ հորմոնալ թերապիային, և ցուցադրել է մահացության նվազում այն հիվանդների մոտ, որոնք վիրահատությունից կամ ճառագայթային թերապիայից հետո ունեցել են շագանակագեղձի քաղցկեղի ռեցիդիվ, և որոնց համար բուժման այլ մեթոդներն այլևս արդյունավետ չեն։
Հետազոտության արդյունքները հրապարակվել են The New England Journal of Medicine ամսագրում և ներկայացվել Բժշկական ուռուցքաբանության եվրոպական ընկերության (ESMO) կոնգրեսում՝ Բեռլինում։
«Սկզբնական բուժումից հետո որոշ հիվանդներ բախվում են շագանակագեղձի քաղցկեղի ագրեսիվ ռեցիդիվի հետ և վտանգում, որ հիվանդությունը արագ կտարածվի», - ասել է դոկտոր Սթիվեն Ֆրիդլենդը՝ Cedars-Sinai Cancer-ի Ինտեգրված քաղցկեղի և ապրելակերպի ուսումնասիրությունների կենտրոնի տնօրենը և հետազոտության համանախագահը։
«Հորմոնալ թերապիան, որը մենք առաջարկում էինք հիվանդներին 30 տարի շարունակ, չէր բարելավում գոյատևումը, և ոչ մի այլ բան նույնպես բարելավում չէր արձանագրում։ Սա այս արդյունքները դարձնում է իսկական բեկում», - ավելացրել է նա։
Հետազոտությանը մասնակցել է ավելի քան 1000 հիվանդ՝ 17 երկրների 244 կենտրոններից։ Բոլոր հիվանդների մոտ ախտորոշվել է շագանակագեղձի քաղցկեղի բարձր ռիսկային կենսաքիմիական ռեցիդիվ։
Վիրահատությունից կամ ճառագայթային թերապիայից հետո նրանց արյան մեջ շագանակագեղձի սպեցիֆիկ անտիգենի (PSA) մակարդակները արագորեն բարձրացել են։ PSA-ն սպիտակուց է, որն օգտագործվում է շագանակագեղձի քաղցկեղը հայտնաբերելու համար, և բուժումից հետո PSA-ի մակարդակի արագ բարձրացումը ցույց է տալիս, որ քաղցկեղը, հավանաբար, կվերադառնա և կտարածվի՝ հաճախ ոսկորների կամ ողնաշարի վրա։
«Մենք գիտենք, որ այս հիվանդները մետաստատիկ հիվանդության զարգացման և քաղցկեղից մահվան բարձր ռիսկի խմբում են, եթե մենք նրանց արդյունավետ բուժում չառաջարկենք», - ասել է Ֆրիդլենդը։
նախընտրելի դարձնել
